Ang bantay sa swimming pool

ANG BANTAY SA SWIMMING POOL
ni Gregorio V. Bituin Jr.
15 pantig bawat taludtod

naroroon ang bantay sa swimming pool, nakatanod
mga bata'y binabantayan upang di malunod
mabuti't may nagbabantay, at di lang nakatanghod
nasasa isip ay kaligtasan, nakalulugod

ang kaligtasan sa tubig ay dapat nasa isip
na sakaling may mangyari'y agad makasasagip
kung may bantay at may nalunod pa rin, di malirip
kung bantay ba'y di alisto o biglang nakaidlip

Tangan nila ang mga bandilang Oriang

TANGAN NILA ANG MGA BANDILANG ORIANG
ni Gregorio V. Bituin Jr.
13 pantig bawat taludtod

tangan nila ang mga bandilang Oriang
simbolo ng Lakambini ng Katipunan
noong Marso Otso'y nagrali sa lansangan
pinakita ang lakas ng kababaihan

may pitong laban pa silang ikinakasa
para sa kababaihan, para sa masa
mga isyung laban sa bulok na sistema
na dapat malutas at kamtin ang hustisya

mabuhay kayo, mga kasama't kapatid
magkaisa upang lutasin ang balakid
sa lipunang sa dilim tayo binubulid
salamat, bagong pag-asa ang inyong hatid

Ang binibining iyon

ANG BINIBINING IYON
ni Gregorio V. Bituin Jr.
15 pantig bawat taludtod

ang binibining iyon, ah, ang binibining iyon
sa aking panaginip ay laging naglilimayon
naroong dinuduyan ng magdamag at maghapon
ah, dama ko ang saya kahit pangarap lang yaon

at doon sa silid na aking pinagninilayan
kariktan niya'y tagos sa aking kaibuturan
kahit buhay ko'y tinigib ng dusa't kalumbayan
ngunit ang binibining iyon, ah, kaligayahan

sana'y maging totoo ang marikit kong diwata
upang alayan ko ng bituin ang minumutya
nawa'y di na ako muling magdusa pa't lumuha
at makamtan din ang ligayang kaytagal nawala

ang binibining iyong magpapalaya sa akin
mula sa sanlaksang lumbay na sa akin umangkin

Itayo ang gobyerno ng masa

ITAYO ANG GOBYERNO NG MASA
ni Gregorio V. Bituin Jr.
15 pantig bawat taludtod

sinusungkit ng anino yaong mga tiwali
dinadagit upang di makabalik na mag-uli
upang ang naghihirap naman ang magsipagwagi
sa pagtutunggaling ito ng magkalabang uri

itayo ang gobyerno ng masa, iya’y hinaing
ng mga dukhang gutom pagkat walang maisaing
nangangarap silang may pag-asa pang paparating
kung buong masa'y magkakapitbisig na magaling

Paghihintay ni Bantay

PAGHIHINTAY NI BANTAY
ni Gregorio V. Bituin Jr.
13 pantig bawat taludtod

nagmamahal sa kanya'y kaytagal hinintay
upang muli niya itong makaagapay
sa maraming bagyo't suliranin sa buhay
bakas sa mukha ang pag-asang sumisilay

Palayain ang lahat ng bilanggong pulitikal

PALAYAIN ANG LAHAT NG BILANGGONG PULITIKAL
ni Gregorio V. Bituin Jr.
15 pantig bawat taludtod

palayain ang lahat ng bilanggong pulitikal
sila'y lumaban para sa bayan at di kriminal
ikulong nyo'y pulitikong sa kurapsyon pusakal
lalo yaong mga ganid sa tubo’t trapong hangal

silang bilanggong pulitikal dapat palayain
sa obrero't dukha'y mga bayani silang turing
silang nakibaka para bayan ay palayain
mula sa kuko nitong mperyalismong salarin

bilanggong pulitikal, may prinsipyo, ikinulong
habang sa tiwali'y gobyerno pa ang nagkakanlong
ang pagpapalaya sa kanila'y ating isulong
silang aktibistang lumaban sa burgesyang buhong

Minsan, sa FB

MINSAN, SA FB
ni Gregorio V. Bituin Jr.
8 pantig bawat taludtod

may isang taong nagalit
inimbitahan lang, nagsungit
may ugali palang pangit
kaibigang anong lupit
simpleng bagay ay nagngitngit

pagpapakatao'y wala
pakikipagkapwa'y sumpa
di kayang magpakumbaba
santambak kasi ang muta
nakita sa dusa'y tuwa

* FB - FaceBook

Sa minumutya

SA MINUMUTYA
15 pantig bawat taludtod

isinuot ko ang ngiting binigay mo sa akin
na nagbigay ng pag-asa upang aking harapin
ang samutsaring pagsubok at laksang suliranin
nang masayang lutasin ito't huwag didibdibin

isinuot ko ang ngiting sa akin ay bigay mo
kaya sa araw-gabi'y tunay akong inspirado
tila naglalambing ang ulap sa himpapawid ko
pati ibon sa pagsinta'y nagpapasirko-sirko

isinuot ko ang binigay mo sa aking ngiti
tila akin nang nakamtan ang pangarap ko't mithi
gayon man, hindi pa sadya, kaya ako'y masidhi
na gawin ang lahat bagamat hangad ko ma'y munti

isinuot ko ang magandang ngiti mong binigay
di ko ito huhubarin tayo ma'y magkawalay
sa iyo'y aking handog lahat ng aking tagumpay
dama ko na ang saya't matamis akong hihimlay

- gregbituinjr.

Tigilan na iyang yosi

TIGILAN NA ANG YOSI
9 pantig bawat taludtod

aanhin pa ba iyang yosi
kung panindi'y di makabili
lagi nang yosi'y tatak-HINGI
hinirama'y di makahindi

tigil na't nakasusulasok
ano pa ba ang sinusubok
ang baga mo na'y binubukbok
ng di na masawatang usok

- gregbituinjr.

Aanhin pa ang yosi kung mayroon kang tibi?

AANHIN PA ANG YOSI KUNG MAYROON KANG TIBI?
7 pantig bawat taludtod

aanhin pa ang yosi
kung mayroon kang tibi?

di ka ba mapakali
sa iyong pagka-busy?

di ka kaya magsisi
at baga’y winawaksi?

ano bang aking paki
sa mga nagyoyosi?

aba’y sige lang, sige
pagsisisi’y sa huli

- gregbituinjr.

Mahalagang text ng isang kasama

MAHALAGANG TEXT NG ISANG KASAMA

"Sometimes you have to stand up and fight for what you believe in. And sometimes it takes even more courage to stay put, to hold your ground and refuse to be bullied. It may not change the bully but it can change you! Courage isn't having the strength to go on. It's going on when you don't have the strength." - Text from Michelle BMP, Jan 17, 2007, 08:42:49 am, na muli kong natagpuan sa luma kong notebook kamakailan lamang.

"Minsan, kailangan mong tumindig at ipaglaban
ang iyong mga pinaniniwalaan, at minsan
mas kinakailangan mo ng todo-todong tapang
upang manatili't tanganan ang tinitindigan
at tanggihan ang maging api-apihan na lamang.
Maaaring di magbabago yaong nang-aapi
ngunit babaguhin ka nito, ikaw na may silbi.
Ang tapang ay hindi lakas na makapagpatuloy,
ito'y pagpapatuloy kung saan wala kang lakas."
Ang payong ito sa text ng kasamang anong giliw
ay nagbibigay lakas-loob na di magmamaliw.
Salamat, kasama, sa iyong text na pinadala
na sa isang kuwaderno’y naisulat ko pala
payo mo’y inspirasyon sa tulad kong aktibista.

- gregbituinjr.

Magkaibang daigdig

MAGKAIBANG DAIGDIG
ni Gregorio V. Bituin Jr.
15 pantig bawat taludtod

tulad ng agilang lumilipad sa papawirin
na naghahanap ng masisila at dadagitin
kapara niya'y burgesyang naghahangad mang-angkin
ng pagtutubuan, gaya ng makina’t lupain

naroon sa laot ang tulad nating mga isda
na nais dagitin ng mga agilang kuhila
tulad niya'y burgesyang sa tubo'y napakasiba
dadagitin tayo hanggang bukas nati'y mawala

mga agilang mananagpang ay nais maghari
pagkat nasa taas akala'y may basbas ng pari
nasa ibaba'y aapihin, sila'y walang budhi
gayong ang ibon at isda'y magkaiba ng uri

di ba't agila't isda'y magkaiba ng daigdig
at sa sarili lang nilang uri sila sasandig
alam ba ng agilang lumangoy, isda'y madaig
alam ba ng isdang lumipad, agila'y malupig

gayon din, iba ang kapitalista't manggagawa
mabubuhay ang mundo kapitalista ma'y wala
at di uusad ang mundo pag walang manggagawa
upang matapos ang digma, isa'y dapat mawala

palayain ang mga nagpapatulo ng pawis
at durugin ang nangabundat sa mais at langis
manggagawa'y di dapat madurog na tila ipis
ng burgesyang ang pagkahayok ay walang kaparis

Karatula sa punò

KARATULA SA PUNÒ

may sadyang lugar na itinalaga
upang doon kayo magsipagbuga
ng usok na tila isang kasama
o kalaguyong laging sinisinta
sa punò, ipinako’y karatula
nang makapagsunog kayo ng baga

sunog-baga, punò ang tagasalo
niyang usok na ibinubuga nyo
kawawang punò, punò kasi ito
at di minamahalaga ng tao
mapunô kaya ang punò sa inyo?
ang usok ba'y aanhin nyo sa dulo?

- litrato’t katha ni gregbituinjr.

Mga upos sa pasô

MGA UPOS SA PASÔ

ang pasô ba ng halaman ay tapunan ng upos?
dahil walang basurahan, isip na'y kinakapos?
paano bang sa kalinisan ay makararaos?
kung simpleng upos ay di maitapon nang maayos?

- litrato't katha ni gregbituinjr.

Never Again sa Batas-Militar

NEVER AGAIN SA BATAS-MILITAR
ni Gregorio V. Bituin Jr.
15 pantig bawat taludtod

huwag kalilimutan ang marahas na panahon
na karapatang pantao'y niyurak at nilulon
ng batas-militar kaya masa'y nasa linggatong
ng kaba't poot, kayraming nawala, ikinulong

huwag kalilimutan ang sama-samang pagkilos
upang panahong marahas ay mag-iba ng agos
hinarap ng taumbayan ang rumagasang unos
hanggang mapatalsik ang lintik na nambubusabos

mabuhay ang lahat ng nagsakripisyo't lumaban
sa diktaduryang dahas, yumurak sa karangalan
ngunit bagong elit ang kumubkob sa pamunuan
bagong burgesyang tadtad din ng mga kabulukan

Isang lakas tayo

ISANG LAKAS TAYO

isang lakas tayong nakikibaka
magkakapitbisig, nagkakaisa
sama-samang ipagtanggol ang masa
upang kamtin ang hangad na hustisya

Sanlakas tayong hindi pagagapi
sa sinumang mga mapang-aglahi
ibabagsak natin sinumang hari
at itataguyod ang ating uri

Sanlakas tayong hindi patatalo
sa sinumang tiwaling pulitiko
lilinisin yaong basahang trapo
tiwali'y dapat magdusa ng todo

Sanlakas tayong hindi madudurog
ng sinumang kapitalistang hambog
mang-aapi'y tiyaking malalamog
tutupdin ang pangarap na kaytayog

Sanlakas na hangad ay pagbabago
sa puso't diwa'y subok ang prinsipyo
sa labanan ay hindi tumatakbo
laging handa sa pagtulong sa tao

- gregbituinjr.

Ilublob sa kanal iyang trapo

ILUBLOB SA KANAL IYANG TRAPO

kampanyahan na naman, muli'y nangangako
ang trapong kayraming kulay, kulay hunyango
mga trapo silang salita ang pamato
animo'y walang laman ang kanilang bungo
kundi pulbura, na ang hangad lagi'y tubo

tulad nilang trapo'y dapat lamang ilublob
sa kanal ng kahihiyang nakakubakob
nangangako sila'y wala naman sa loob
dapat ibagsak ng masang sadyang marubdob
na sistema ng trapo'y tuluyang itaob

- gregbituinjr.

Lungagi

LUNGAGI
ni Gregorio V. Bituin Jr.
13 pantig bawat taludtod

di maawat sa daldal ang taong lungagi
na minsan man sa atin ay nagpapangiti
datapwat pulos yabang ang namumutawi
ay saglit din namang problema'y napapawi

lasing na kaya ang tindera'y kinukulit
pinangangakuang ibibigay ang langit
mapungay ang matang animo'y nang-aakit
kahit pawang kayabangan ang sinasambit

* lungagi - lasing na tamang kulit (mula sa UP Diksyunaryong Filipino)

Ang babae daw ngayon

ANG BABAE DAW NGAYON
ni Gregorio V. Bituin Jr.
13 pantig bawat taludtod

may isang nagsabing ang kababaihan daw ngayon
ay di singhusay ng nanay nila sa pagluluto
ngunit singhusay ng kanilang ama sa pag-inom
tunay ba ang kanyang puna't iba na nga ang turo?
kung may pagbabago sa bawat paghampas ng alon
sa asal ng tao'y may naglalaho't nabubuo

Kung papatayin mo lang ang manggagawa

KUNG PAPATAYIN MO LANG ANG MANGGAGAWA
ni Gregorio V. Bituin Jr.
15 pantig bawat taludtod

kandidato ka ba ng kapitalistang kuhila
kaya pati sa nag-unyon, ikaw ay nagbabanta
wika mo, papatayin mo ang mga manggagawa
pag nanggulo't sa mga kapitalista'y may hidwa
lampa ka pala, este lumpen pala, utak-biya

kung sa problema'y pagpaslang ang alam mong solusyon
anong klaseng hayop ka't magpapangulo ng nasyon
obrero ba'y kriminal, nahan ang sentido komon
pag pinaglaban ang karapatan, krimen na iyon?
tila sa kapangyarihan, ikaw na'y nagugumon

sayang ka, kung ang alam mo lang lagi ay pumatay
kung karapatang pantao'y yuyurakan mong tunay
kung pagkatao ng kapwa'y iyo lang maluluray
kung alam mo lang maghilera't magbilang ng bangkay
buting huwag tumakbo't wala kang bukangliwayway

manggagawa pala sa iyo'y walang mapapala
kundi sa karapatan nila'y pagbabalahura
kapitalista pala ang amo mong dalahira
balang araw, ibabagsak ka rin ng manggagawa
pangako iyan, ibabagsak ka ng manggagawa

Ang salapi

ANG SALAPI
ni Gregorio V. Bituin Jr.
15 pantig bawat taludtod

papel lamang kung tingnan ngunit kaylakas mang-akit
tila diyos, sinasamba ng matatanda't paslit
kung sinong marami niyan animo'y nasa langit
tinitingala kahit asal niya't mukha'y pangit

dahil sa salapi, kapwa niya'y minamaliit
dahil sa salapi, kayrami sa'yong lumalapit
dahil sa salapi, nagiging agila ang pipit
dahil sa salapi, tunggalian ay hanggang langit

kapangyarihan nito'y matatanong mo kung bakit
kaya nitong bayaran ang kahit kaninong singit
ng mga bayarang ibinubuyangyang ang langit
para lang sa salaping may mahikang anong lupit

sa ipinagbiling dangal, salapi ang kapalit
labanan sa husgado'y salapi rin ang pang-akit
sa mapera, laksa ang 'kaibigang' humihirit
nang dahil sa kwarta, tahanan mo'y kayang mailit

o, salapi, ikaw na diyos ng bata't may-edad
ano't pinaiikot mo kami sa iyong palad?
sa mundo ang masalapi'y karaniwang mapalad
habang ang walang-wala't api'y karaniwang hubad

Pagsipat sa Bantayog

PAGSIPAT SA BANTAYOG
ni Gregorio V. Bituin Jr.
13 pantig bawat taludtod

kayraming pangalan nila ang nakatala
sa malawak na pader ng mga bayani
sa batas-militar ay nakibakang sadya
pilit nilabanan ang diktadurang imbi

pagkat sila'y di dapat ibaon sa limot
sa Bantayog ng mga Bayani'y naroon
silang nangarap ayusin ang mga gusot
at maituwid ang binaluktot na nasyon

pag sinipat-sipat natin yaong bantayog
at malalaman natin ang kanilang kasaysayan
mahihiya sa kasalukuyang pag-inog
pinangarap nila'y di pa pala nakamtan

kayhirap mabuhay ng gising sa bangungot
dapat tanggalin ang mga agiw sa sulok
ang mga damong ligaw ay dapat mabunot
dapat kalusin pag umapaw na ang salop

bayani ang mga pangalang nakatala
kaya di sila dapat malimot ng madla

Kapara niya'y ngiting Ara Mina

KAPARA NIYA'Y NGITING ARA MINA
ni Gregorio V. Bituin Jr.
15 pantig bawat taludtod

ninasa ng maraming binata ang ngiting yaon
na sa kanilang puso'y tunay na nakahalina
sa bawat lakbayon ay tangan nilang inspirasyon
ang ngiti ng dilag na animo'y si Ara Mina

nagbibigay sigla't liwanag ang kaygandang ngiti
siya ang diwatang hinahangaan ng kayrami
animo'y maryaklarang kaysarap hagkan ang labi
at di mo aasaming mawalay sa kanyang tabi

sino ba namang binatang aayaw sa ganito
na ngiti pa lang ay nagpapatibok na ng puso
kayanin kaya niyang araw-gabing titigan ko
ngunit baka siya'y mangalay at ako'y mabigo

ngiti lang niya ang sa sawing puso ko'y gumising
siyang nagpabangon sa matagal kong pagkahimbing

Kailangan ba ng isang tagapagligtas

KAILANGAN BA NG ISANG TAGAPAGLIGTAS?
ni Gregorio V. Bituin Jr.
15 pantig bawat taludtod

kailangan ba ng tagapagligtas itong dukha
tulad nina Batman, Robin, Mesiyas, o Bathala
anong dapat upang sa sistemang bulok lumaya
nang makaalpas ang tao sa kahirapang sumpa
at makamtan sa buhay ang mailap na ginhawa

o sa haba na ng tinakbo nitong kasaysayan
may tagapagligtas noong unang panahon lamang
batay sa mga kwentong animo'y kababalaghan
kung kailan ang populasyon ay kaunti pa lang
ngunit wala nang tulad niyon sa kasalukuyan

tulad ng kwento nina Zorro't Superman sa sine
bayan-bayan iniligtas, tinuring na bayani
ngunit sa mga kathang isip lang sila nagsilbi
kaya walang tulad nila diyan sa tabi-tabi
kaya paano natin sila ipagmamalaki

sinong magliligtas sa atin sa maraming hangal
laban sa pulitikong tambay sa mabahong kural
laban sa panunuyo ng nagkukunwaring banal
laban sa gawain ng kapitalistang pusakal
kaya ba ng isang Mesiyas ang tusong kapital

huwag tayong umasang may isang tagapagligtas
na sasagip sa atin sa tiwali, dusa't dahas
iangat natin ang ating kamalayan at antas
ang ating aasahan upang mundo'y maging patas
ay ang sama-sama nating pagkilos nang parehas

Ayaw kong mapaso sa sariling apoy

AYAW KONG MAPASO SA SARILING APOY
ni Gregorio V. Bituin Jr.
15 pantig bawat taludtod

humahalakhak man ang langit sa kinasapitan
di ko madalumat ang naranasang kasawian
inuugoy ng alon sa pagtahak sa kawalan
habang niyuyugyog ng hangin ang buong katawan

mahapdi sa balat ang matinding sikat ng araw
apoy sa loob ko'y sumulak, ako'y natutunaw
napapaso ang buong ako, parang hinahataw
ng kung anong imaheng animo'y isang halimaw

di ko gagawin yaong sa kapwa'y manliligalig
nais ko'y patas, prinsipyado't nasa tamang tindig
sa sinumang nambubusabos ay di palulupig
habang lahat ng manggagawa'y magkakapitbisig

ayaw kong mapaso sa sariling apoy ng dusta
bagamat labas sa aking pagkaako ang saya
nais ko lang maging kaisa sa danas ng masa
at sama-sama naming lalandasin ang pag-asa

Kapara ko'y inihagis sa malalim na dagat

kapara ko'y inihagis sa malalim na dagat
at pinabayaang lumangoy mag-isa sa alat
ang bawat hampas ng alon sa dibdib ko'y kaybigat
naulila doong ang bukas ay di madalumat
- gregbituinjr. (pakiramdam nang mawalan ng opis ang BMP)

Paglisan

PAGLISAN
13 pantig bawat taludtod

sa pagkatuliro'y nanalasa ang lumbay
di inaasahang bigla akong mamatay
ngayon, umpisa na ng aking paglalakbay
ngunit di malaman ang tutunguhing tunay

tila ba hinehele sa pagkakaidlip
ang nagdaang buhay ay di sukat malirip
nakipagbuno sa lipunang anong sikip
at dumidilang apoy yaong nakahagip

dinuduyan ng hanging biglang bumulusok
biglaan, iniwan na ang lipunang bulok
inanay na haligi'y tuluyang nagapok
at nilisan na ang sistemang di malunok

sino ang papalit ngayong ako'y lumisan
ah, marami pang tibak na handang lumaban
sila ang uugit ng bagong pamayanan
isang lipunang patas at makatarungan

- gregbituinjr.

mamamatay na lang ba akong...

mamamatay na lang ba akong
walang laman ang mga tula
kundi pawang himutok, luha
panimdim, at pangungulila

ako ba'y mamamatay na lang
nang di tuluyang naaangkin
ang inaasam kong diwata
na anghel ang kariktang angkin

ako lang ba ay mamamatay
na yapos ay sanlaksang lumbay
pagkat di napapagtagumpay
ang mga pangarap na tunay

sana naman, mamatay akong
nagisnan ang bagong umaga
at di nasidlak sa kadimlan
ng kawalan ng katarungan

- gregbituinjr

Plastik na trapo

PLASTIK NA TRAPO
ni Gregorio V. Bituin Jr.
10 pantig bawat taludtod

lulutang-lutang sa karagatan
ang mga plastik ng kahihiyan
malinis na tubig ay dinumhan
ng mga nagtatapon kung saan

lulutang-lutang sa kampanyahan
ang pulitikong tuso't gahaman
ang trapong plastik ng kahihiyan
na pinandidirihan ng bayan

plastik na trapo'y lulutang-lutang
kayrumi nilang mga basahan
sa dagat kaya'y malilinisan
o dapat malunod nang tuluyan

ang trapong ubod ng kaplastikan
ay dapat mawala nang tuluyan
sa pagkalutang sa karagatan
at lalong-lalo na sa lipunan

Huwag sayangin ang buhay

HUWAG SAYANGIN ANG BUHAY
ni Gregorio V. Bituin Jr.
15 pantig bawat taludtod

nakakasuka ang buhay na walang adhikain
walang kwenta, kamatayang ikaw ay yayapusin
ano bang saysay ng buhay na walang simulain
walang kasiyahan, ano bang marapat mithiin
tayo ba'y nabuhay lang sa mundo upang kumain

hindi, ayaw ko nang gayong buhay, nakatunganga
sayang lang ang buhay pag walang anumang adhika
sayang lang ang buhay pag lagi nang nakatulala
sayang lang ang buhay pag wala namang ginagawa
kundi magpalaki ng bayag, tumitig sa wala

ano ka kung maangkin mo man ang buong daigdig
kung hari ka ngang inaasahan mo lang ay kabig
ano ka kung pulos salapi man ang iyong banig
ano ka kung sa isyung pambayan ay walang tindig
ano ka kung panaghoy ng kapwa'y di dinirinig

mas maigi ang buhay na may magandang adhika
kaharapin man ay timba-timbang agos ng luha
nasa loob ay magpakatao't makipagpagkapwa
sa puso't isip ay kabutihan at pagpapala
at buhay na ito'y matitigib ng ligaya't tuwa