Pagtitig sa kawalan

PAGTITIG SA KAWALAN

ang makata'y naroong nakatitig sa kawalan

bakit kaya? ano na namang pinagninilayan?

bakit puno ng plastik at upos ang karagatan?

dumating ang Bakunawa nang pumula ang buwan?

ang natanaw ba'y ang dambuhalang hayop na Lumbong?

ano nang gagawin sa natipong hibla't yamungmong

nagutom ba't nalimutan ang inihandang bug-ong?

bakit kayrami ng tao sa nadaanang tuklong?

maglalamay muli mamaya sa gawaing salin

lumulubog na mata'y si misis ang nakapansin

bagong damit ay ihiwalay muna sa labahin

baka malalinan ang puti, lalo na't dumihin

ang musa ng panitik ba'y muling dumalaw doon

upang bigyan ang abang makata ng inspirasyon?

maraming tanong na hanap ay maayos na tugon

sa pagkatitig, makata'y iidlip at babangon

- gregoriovbituinjr.05.28.2021

Isa lang akong panitikero

"Poets are the unacknowledged legislators of the world." 

~ Percy Byshe Shelley (1792-1822), makata mula sa Inglatera

huwag birahin, isa lang akong panitikero

bagamat mga tuso't tiwali'y binibira ko

huwag din sanang tokhangin ang manunulang ito

kahit krimeng pagtokhang ay binibirang totoo

bagamat di naman nasulat sa anumang batas

na sa akda'y bibirahin sinumang talipandas

marangal ang layon at misyon naming nilalandas

lalo't hangad ay lipunang gumagalaw ng patas

pag may kamalian, marapat ba kaming pumikit

lalo't pinagsasamantalahan ang maliliit

lalo't babae't dukha'y inaapi't nilalait

tamang presyo ng lakas-paggawa'y pinagkakait

kung kabulastugan ay isiwalat ko sa tula

kung nangyayari sa bayan ay aming isadula

kung sa aming kwento'y ilahad ang danas ng madla

ito'y marangal na tungkulin ng mga makata

isa man akong panitikero, may adhikain

upang mali sa lipunan ay aming tuligsain

at kung dahil sa tungkuling ito ako'y patayin

ay magkakabahid ng dugo ang pluma kong angkin

- gregoriovbituinjr.

05.28.2021

Kurot sa puso

may kurot sa puso ang bawat kong pinapangarap

tulad ng limanglibong tulang tatapusing ganap

habang ang ilawan sa silid ko'y aandap-andap

habang ang musa ng panitik ay kinakausap

tagumpay ang tanging nobelang katha ni Harper Lee

ito nga ang "To Kill a Mocking Bird" ng binibini

dalawa lang ang nobela ni Rizal, Noli't Fili

kay Stephen King ay gusto ko ang Pet Sematari

kahit isang nobela lang ay dapat pag-isipan

paano magaganap kung di ito sisimulan

sa unang kabanata pa lang ay pagpapawisan

ngunit dapat naroong nakatuon ang isipan

dapat nga bang pusong bakal ang mga kontrabida?

talaga nga bang mapagsamantala ang burgesya?

panlipunang hustisya't karapatan ba ang tema?

ah, di ako dapat mabigo sa unang nobela

nakapaglathala na nga ako noon ng libro

na hinggil sa "Ang Una Kong Sampung Maikling Kwento"

ito ang isa kong batayan at kakapitan ko

upang makakatha ng nobela, isa man ito

unang hakbang, unang simula, unang kabanata

may kurot sa puso, sadyang ako'y napapaluha

pagkat pinagbubuntis ang nobelang kinakatha

sa sinapupunan ng makatang may luha't tuwa

- gregoriovbituinjr.05.28.2021

Maraming hakbang pang lalandasin

MARAMING HAKBANG PANG LALANDASIN

napagtanto kong maraming hakbang pang lalandasin

gaano man kalayo ang lugar ay mararating

dapat maging handa kung mapudpod ang gagamitin

patungo sa mga sangandaang nais tahakin

sa tula nga ni Robert Frost ay aking naalala

na daang bihirang tahakin ang nilandas niya

tulad ng paglakad sa Tacloban galing Luneta

na kasama akong nakaranas dahil sa klima

hanggang aking buksan ang isang panibagong pinto

kumbaga sa akda'y tatahakin ang bagong yugto

habang nabubuhay ay pangarap na di maglaho

kaya sa paghakbang na ito'y tiyak walang hinto

libo na ang tula, walang nobela kahit isa

na pangarap kong malikha habang nabubuhay pa

tangkang tahakin ang pagkatha ng unang nobela

kung saan walang iisang bida kundi ang masa

habang nakatalungko'y patuloy sa pagninilay

mga kwento ng karaniwan ang adhika't pakay

tauhan, tagpuan, tunggali, kabanata, banghay

maisulat na ito bago tumawid ng tulay

- gregoriovbituinjr.05.28.2021

Pala-palagay

I

nahan ang mahal

napatigagal

sumbong ng bungal

nagpakabanal

nakalulungkot

tila bangungot

saan sumuot

at nagpakipot

kaya ang sinta

ay nagwala na

nagtago daw ba

ito sa kanya

II

sila't tumagay

ng walang humpay

nang may umaray

di napalagay

pagkat biglaan

ang kahangalan

pinaglaruan

yaong hukluban

buti ng puso

na ba'y naglaho

at dinuduro

ang masang dungo

III

kayraming gusot

ang idinulot

ng mapag-imbot

at tusong salot

nahan ang bait

sa dukha't gipit

na nilalait

ng malulupit

kapwa'y mahalin

huwag apihin

sila'y tao rin

ating isipin

- gregoriovbituinjr.

05.28.2021