Di lang dayuhan

DI LANG DAYUHAN

di lamang mapang-aping dayuhan

kundi mapang-aping kababayan

at mapagsamantalang iilan

ang dahilan niring kahirapan

at sanhi ng ligalig sa masa

pati kabulukan ng sistema

di lang dayuhan, kababayan pa

ang sanhi ng pagsasamantala

España't Amerika'y nanakop

dayuhang mula ibang lupalop

Hapon at marsyalo'y sumalikop

turing sa ati'y para bang hayop

kaya sa mga awit at tula

ay tukuyin ang sanhi sa akda

di lang dayuhan kundi kuhila

at ang sistemang kasumpa-sumpa

- gregoriovbituinjr.

12.13.2022

Tikom at kuyom

TIKOM AT KUYOM

nais nilang tikom ang bibig ko

at manahimik na lamang ako

hindi maaari ang ganito

ayokong mabilog itong ulo

kaya di titikom yaring bibig

sa mga nangyayaring ligalig

marapat lang isinasatinig

ang anumang dapat inuusig

kaya di pwedeng bibig ko'y tikom

laban sa dusa, hirap at gutom

lalo't kamao ko'y nakakuyom

diyan ang buhay ko malalagom

ang kamao kong kuyom ay tanda

ng pagbaka sa tuso't kuhila

sistemang bulok nga'y sadyang banta

sa buhay ng manggagawa't dukha

- gregoriovbituinjr.

12.13.2022

Kinayod

KINAYOD

sinangag sa kawali'y kinayod

kamay man ay nangalay, napagod

ngunit sa agahan ay malugod

para bang hinahaplos ang likod

iyon ang ulam ko sa agahan

kaning bahaw ay pinainitan

isinangag, anong sarap naman

ng agahang may pagmamahalan

malamig na bahaw man ang kanin

bilin ni misis, huwag sayangin

ito nama'y makabubusog din

upang tiyan ay di hinahangin

kinayod ko ang natirang tutong

sa puso'y saya ang ibinulong

- gregoriovbituinjr.

12.13.2022