Boxer Nesthy Petecio, Bronze Medalist sa Paris Olympics

BOXER NESTHY PETECIO, BRONZE MEDALIST SA PARIS OLYMPICS

naging silver medalist siya sa Tokyo Olympics

ngayon, nag-bronze medalist siya sa Paris Olympics

sadyang makasaysayan, siya'y talagang matinik

sa larangan ng isport, ngalan na niya'y natitik

si Nesthy ang ikalawang babaeng boksingero

na nagkatansong medalya sa Olympics na ito

ang una'y si Aira Villegas, palabang totoo

silang dalawa'y sadyang mabilis at matalino

subalit pawang natalo sa pagkamit ng pilak

puntirya't misyon nilang ginto'y talagang pinisak

ngunit nakamit nila'y dapat nating ikagalak

sa kaylupit na galawang buti't di napahamak

O, Nesthy Petecio, ikaw pa rin ay nagtagumpay

sa daming boxer na kalahok, nagka-bronze kang tunay

marapat sa iyo ang mataas na pagpupugay

sa mga dakilang atletang Pinoy mahahanay

- gregoriovbituinjr.

08.09.2024

* ulat mula sa pahayagang Remate, Bulgar, at Pilipino Star Ngayon, Agosto 9, 2024, pahina 12

Sa Pandaigdigang Araw ng mga Katutubo

SA PANDAIGDIGANG ARAW NG MGA KATUTUBO

(International Day of the World's Indigenous Peoples)

sa pandaigdigang araw ng mga katutubo

pagpupugay ay pinaaabot nang taospuso

silang may karapatang dapat igalang ng buo

taong dapat kilanlin, saanmang panig ng mundo

salamat sa United Nations, may ganitong araw

katutubo sa bawat bansa'y igalang na tunay

lupang ninuno'y di ariin, di dapat magalaw

ng kapitalistang kamatayan namin ang pakay

ang katutubo'y nagpoprotekta sa kalikasan

na madalas mataboy dahil sa mga minahan

sinisira ng negosyo ang kanilang tahanan

inaagaw ng may kapital pati kalupaan

katutubo'y huwag ituring na uring kaybaba

sapagkat tao ring may malayang kultura't diwa

na pawang naghahangad ng daigdig na payapa

na dapat maprotektahan maging sa ating bansa

- gregoriovbituinjr.

08.09.2024

Nanghihingi si Muning

NANGHIHINGI SI MUNING

ako'y taong naritong natutuwa

sa mga inaalagaang pusa

pag ako'y nakita nilang dumating

agad silang sa akin ay dadaing

nais ng pagkain, nakikiamot

sila'y bibigyan ko't di nagdadamot

kung may maiabot lang sa kanila

sila'y mapapakain ko talaga

tulad ni Muning na aking kaharap

walang ibang sa kanila'y lumingap

bahala sila sa kanilang buhay

malalaki na sila, anang nanay

matutong daga'y kanilang mahuli

upang di gutumin sa bandang huli

habang ako naman ay nalulugod

na magbahagi ng munti kong kayod

- gregoriovbituinjr.

08.09.2024

* mapapanood ang bidyo sa kawing na: https://fb.watch/tRHbM9vyfh/ 

Hangal o banal?

HANGAL O BANAL?

ako ba'y isang makatang hangal

o ituring mong makatang banal

na sabi nila'y nakatatagal

sa dagok ng mag-asawang sampal

hinahanap ko'y mga salita

na mangyaring palasak ang diwa

kung di man makabago o luma

upang magamit ko sa pagkatha

sa pagsasaknong ay nagkakayod

sinasalansan bawat taludtod

maging bolpen o lapis na upod

sa anumang digma'y sumusugod

kahit diksyunaryo'y binabasa

na para bagang isang nobela

ganyan yata ang makatang aba

naligaw at nanliligaw pala

hangal o banal ba'y iyong tanong?

ang makata'y di nagmamarunong

niyakap ko lang maging ay yaong

mananaludtod at mananaknong

- gregoriovbituinjr.

08.09.2024

* litratong kuha ni misis sa Art in Island sa 15th Ave., Cubao, QC