Putikang daan

PUTIKANG DAAN

lulusong ka sa putikan

sa araw-araw ba naman

pagkat doon ang tahanan

sa makipot na looban

pader pa'y nakatagilid

ang banta nito'y di lingid

parang pansakal na lubid

nakakapatid ng litid

sila'y iskwater sa turing

bahay ay di nila angkin

pag minsan, walang makain

may pagpag, di gugutumin

iskwater na nalalantad

sa progresong tila huwad

istrukturang pinaunlad

nagniningning ngunit hubad

umunlad ang mga tulay

at gusaling matitibay

di umunlad dukhang buhay

na animo'y nasa hukay

maalikabok ang daan

lalo't araw, kainitan

dahil kagabi'y umulan

ay nagputik ang lansangan

nasaan na ang pag-unlad

kung putik ang nilalakad

dukha'y ginhawa ang hangad

ngunit sa hirap ay babad

ang daan man ay maputik

kung masa'y magkapitbisig

kung karapatan ay giit

kakamtin din yaong langit

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Makipot sa looban

MAKIPOT SA LOOBAN

napakakipot ng daan

sa pinuntahang looban

mga dukha'y tinitirhan

ang lupang di ari't yaman

baka mapalayas sila

sa lupang di pa kanila

nagpapatulong ang masa

sa pananahanan nila

bahay nila'y dikit-dikit

barongbarong, maliliit

pag apoy ay pinarikit

sunog na sa isang saglit

bakit sistema'y ganito

ang tanong nila't tanong ko

silang mamamayan dito

ay iskwater sa bayan ko

araw-gabi, kumakahig

nagugutom, inuusig

silang mga walang tinig

ay dapat magkapitbisig

ganyang buhay sa looban

hirap din ang kalooban

ang kaginhawahang asam

ay kailan makakamtan

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Panawagang pangkalusugan

PANAWAGANG PANGKALUSUGAN

mahalagang pundasyon ng mga kababaihan

ang ipaglaban ang kalusugan ng mamamayan

namnamin lamang natin ang kanilang panawagan

nang pinaglalaban nila'y ating maunawaan:

"Pandemya sa kalusuga't kahirapan, wakasan!"

"Universal Health Care ay ipatupad at pondohan!"

panawagang mapagpalaya sa kababaihan

hiling nilang dapat tugunan ng pamahalaan

na kung si Ka Walden Bello na ating kandidato

ay maipanalo't mauupong Bise Pangulo

panawagan ng kababaihan ay sigurado

matutupad ang makatarungang hiling na ito

kaya sa kalusugan ng bayan, kasangga natin

sina Ka Leody de Guzman, lalo si Ka Walden

kaya patuloy nating isulong ang adhikain

sa kalusugan ng sambayanan, ating mithiin

- gregoriovbituinjr.

03.13.2022

* litratong kuha ng makatang gala sa rali noong Araw ng mga Kababaihan

Almusal

ALMUSAL

tara, tayo nang mag-almusal, simpleng agahan lang

lalo't madaling araw ay nagutom at nagising

bumangon, hilamos, nagsaing, nagluto ng ulam

may kamatis, sibuyas, mayroon pang pritong daing

sa pagkahimbing ko'y sinundan pala ng diwata

na nang mapalapit sa akin, amoy ko ang bango

tila baga puso ko'y nabihag, di masawata

sa pagsinta sa diwatang sumuyo sa puso ko

hanggang maalimpungatan at mata'y iminulat

sa katotohanang wala ang diwata sa tabi

nagutom lang ako sa pamamasyal naming sukat

sa panagimpan habang diwata'y minuni-muni

ah, makakain na nga ng masarap na almusal

at idighay na lamang ang nangyaring panaginip

ayos na ang pritong daing kahit walang pandesal

nakabubusog na rin, anuman ang nalilirip

- gregoriovbituinjr.

03.13.2022