PANGARAP NG MGA BATANG ISKWATER
ni Gregorio V. Bituin Jr.
11 pantig bawat taludtod
namamayat sila dahil sa gutom
at nanlilimahid dahil sa hirap
ngunit dusa'y parang di alintana
pagkat patuloy silang nangangarap
tutunguhin nila ang himpapawid
tatawirin ang mga karagatan
sasakyan ang tren kahit malayuan
lalakbayin kahit sampung kabundukan
susubukang sungkitin kahit buwan
kahit sa hangin ay makikiangkas
ngunit pinakamatingkad sa lahat
sila'y magsisipag at magsisikap
maabot lang ang kanilang pangarap
kaya sa kanila'y magtataka ka
akala mo'y di hirap, nagsasaya
nakangiti pa sila kahit gutom
