Panligaw o mali ang pamagat?

PANLIGAW O MALI ANG PAMAGAT?

‎

‎U.S. State Capital ang pamagat

‎ngunit pagkain ang pagpipilian

‎tila nililigaw tayo ng landas

‎na duduluhin pala'y kapalpakan

‎

‎anong kinalaman ng meatloaf, fillet,

‎steak, sauce, at brisket sa kapitolyo

‎ng mga estado doon sa U.S.

‎ito kaya'y pagkain sa Washington?

‎

‎marahil ngunit iba ang himaton

‎o clue, kaylayo kung susundin iyon

‎bakit kaya ganyan ang pagkasulat

‎o baka namali lang ng pamagat

‎

‎gayunpaman, mabuti't nasagutan

‎ang nilalaro kong palaisipan

‎ang pamagat man ay nakalilito

aba'y di naman tayo natuliro

‎

‎- gregoriovbituinjr.

‎03.19.2026

* mula sa larong Word Shatter sa selpon

Awit sa desaparesido

AWIT SA DESAPARESIDO

‎

‎ang búhay nila'y inumit

‎ng sinumang malulupit

‎hustisya sana'y makamit

‎ng mga winalang pilit

‎

‎- gregoriovbituinjr.

‎03.19.2026

* mapapanood ang munting bidyo sa: 

https://www.facebook.com/share/v/1TvkmtWpgx/ 

Hindi mananahimik ang tahimik na makatâ

HINDI MANANAHIMIK ANG TAHIMIK NA MAKATÂ

tahimik lang ang makatang nakapangalumbabâ

malalim ang nilay sa pasamano ng bintanà

tila may suliranin o unos na nagbabadyâ

habang mahigpit na tangan ang prinsipyong dakilà

panatà sa sarili'y di siya mananahimik

sa mga isyung masa'y apektado, magsaliksik

agad upang magsuri ng isyu at isatitik

ilalahad ang nakitang walang patumpik-tumpik

lalo ngayon, dahil sa digmâ, lahat apektado

nagtataasan na ang bilihin, lalo ang krudo

kayrami pang mapagsamantalang nagnenegosyo

upang limpak na tubo'y mahamig ng mga ito

hindi pa tayo tapos sa isyung pangungurakot

ng mga buwaya't buwitreng dapat lang managot

ang makata'y magpapatuloy sa pakikisangkot

hindi mananahimik upang maplantsa ang gusot

- gregoriovbituinjr.

03.19.2026

Si Bulakna

‎SI BULAKNA
‎
‎black belter umano sa arnis si Bulakna,
‎isang babaylan, mandirigmâ, makatâ pa,
‎at kay Lapulapu ay butihing asawa,
babae, pinunô, ating bigyang halaga
‎
‎nakita sa eksibit ni Kidlat Tahimik
‎nang mata ko'y imulat, di na maipikit
‎si Bulakna pala sa arnis ay kaylupit
‎pangalan niya sa kasaysayan igiit
‎
‎dapat pa tayong magsaliksik ng ganito
‎dapat pa nating saliksikin ang ganito
‎tagong kasaysaya'y halungkating totoo
‎ngala'y idagdag sa bayaning Pilipino
‎
‎O, Bulakna, pangalan mo'y isinadiwà
‎sa Mactan ay isa kang bayaning dakilà
‎kaylaki ng papel ng babae sa bansâ
‎"Bayani ng Arnis", itatawag kong sadyâ
‎
‎- gregoriovbituinjr.
‎03.19.2026
‎
‎* mga litrato kuha ng makatâ noong Marso 15, 2026 sa MET