Sa Timog-Katagalugan

SA TIMOG-KATAGALUGAN

nagpapatuloy ang kampanyahan

doon sa Timog-Katagalugan

upang maipagwaging tuluyan

ang kandidato sa panguluhan

maipanalo si Ka Leody

ng masang ating kinukumbinsi

lalo sa mga bagong botante

na sa bagong pulitika'y saksi

kahit tumatagaktak ang pawis

ang ikinakampanya'y malinis

walang korupsyon o bahid-dungis

ngunit magaling makipagtagis

anti-dinastiyang pulitikal

anti-trapo at anti-kriminal

anti-burgesya't anti-pusakal

ang sistema nga'y kanyang inaral

line-up niya'y ating ipanalo

sa pagka-Bise'y si Walden Bello

bilang Senador: Luke Espiritu,

Roy Cabonegro, at D'Angelo

doon sa Timog-Katagalugan

sigaw namin: Manggagawa Naman

P.L.M. partylist, atin iyan

para sa uri, para sa bayan

- gregoriovbituinjr.

03.21.2022 World Poetry Day

Pasasalamat

PASASALAMAT

salamat sa lahat ng dumalo

sa World Poetry Day ngayon dito

pagkat nagtulaan tayo-tayo

sa munting aktibidad na ito

kasama ang mga maralita

na talaga kang mapapahanga

pagkat sila'y nakisamang sadya

sa pagbabasa ng mga tula

tula'y binasa ng malumanay

iba'y binasa iyong kayhusay

binigkas nilang buhay na buhay

kaya taos kaming nagpupugay

matapos iyon ay nagmeryenda

mani, pandecoco, ensaymada

may saging, kanin, pritong isda pa

lahat kami'y umuwing masaya

muli, taospusong pasalamat

sa mga dumalo rito't sukat

sa World Poetry Day, aktibidad

natin tungo sa lipunang sapat

- gregoriovbituinjr.

03.21.2022

* salamat sa mga dumalong maralita mula sa komunidad ng Brgy. San Miguel at Brgy. Palatiw sa Lungsod ng Pasig

Pagtula

PAGTULA

di napuntahan ang toreng garing

upang magsanay maging magaling

ngunit napunta sa magigiting

na bayaning may mabuting supling

isinilang akong walang-wala

sa daigdig na puno ng sigwa

binigay ko ang lahat sa tula

dito ako dinala ng mutya

na kilalang Musa ng Panitik

na haraya'y tigib, liglig, siksik

na binungang diwa'y sadyang hitik

upang itula ang masa't hibik

patuloy ako sa paglalakbay

tinawid yaong bundok at tulay

at nilangoy ang laot ng malay

ay patuloy sa pagkatha't pakay

hanggang mailarawan sa akda

ang pinagsamantalahang dukha

at mga naaping manggagawa

dahilan sa sistemang kuhila

dahon ng kalikasa'y naluoy

di magawang pakuya-kuyakoy

paa ko'y lumubog sa kumunoy

subalit sa pagtula'y patuloy

- gregoriovbituinjr.

03.21.2022 World Poetry Day

Ngayong World Poetry Day

NGAYONG WORLD POETRY DAY

nakatulala sa tala

sa tulay nakakatula

ng tulang palabang diwa

may tula'y subok sa sigwa

halina't tula'y ibigkas

sa ating munting palabas

sana'y may lipunang patas

nasa'y lipunang parehas

World Poetry Day na ngayon

pangarap pa ring sumulong

sa hamon ay di uurong

sa laban man ay sumuong

tara, tayo'y magsikatha

ng tulang nasasadiwa

paksa ma'y para sa dukha

o sa uring manggagawa

diona, tanaga, dalit

bigkasin sa maliliit

karapata'y ginigiit

upang hustisya'y makamit

sa epiko'y isiwalat

ang sa mga trapo'y banat

magsusulat, magmumulat

hustisya'y para sa lahat

- gregoriovbituinjr.

03.21.2022