Kayraming talbos sa likodbahay

KAYRAMING TALBOS SA LIKODBAHAY

dumaan muna ng bahay sa La Trinidad

na pitong kilometro lang mula sa Baguio

doon na muna nagpalipas ng magdamag

pagkat sa biyahe'y kaytindi nga ng bagyo

dumating kagabi, at dito na natulog

at ngayong umaga'y maaga nang gumising

sa likodbahay ay kaylalago ng talbos

ng kamote, pang-almusal na uulamin

mamaya kami maglalakbay pa-Maynila

kasamang bibiyahe'y mga kamag-anak

ni misis, at nagnilay matapos lumuha

ng tahimik habang ako na'y nakagayak

kayraming talbos sa likodbahay na iyon

buti kaya'y mamitas at magdala niyon

- gregoriovbituinjr.

06.28.2025

Balakin

BALAKIN

magpasa ng bukrebyu at sanaysay

sa publikasyon tulad ng Liwayway 

sa pagsusulat ay magpakahusay

kwento, pabula, tula'y gawing tulay

katha ng katha, kathang walang humpay

ituloy ang gawaing pagsasalin 

ituloy din ang yakap na tungkulin

ituloy kung may proyektong nabinbin

ituloy na bayaran ang bayarin

ituloy ang pantibak na gawain

naririto akong abang makata 

upang kumatha ng nobela't tula

Liwayway, Taliba ng Maralita

mga isyu ng manggagawa't dukha

kaharap man ay sangkaterbang sigwa

- gregoriovbituinjr.

06.28.2025

Pagtula

PAGTULA

tula ang tugon ko sa depresyon

kung di na makatula paglaon

baka ako na'y dinaklot niyon

at paano na makababangon

tula ng tula, anumang paksa

sa paligid, isyu man ng madla

tula ng tula, tula ng tula

ang gagawin ng abang makata

depresyon nang mawala si misis

luha ko'y bumabalong na batis

durog na puso na'y nagtitiis

sa pagkagupiling ba'y lalabis?

buti't may pagtula akong sining

diwa'y kumakatha kahit himbing

isusulat na lang pag nagising

ang liyab at kirot ng damdamin

- gregoriovbituinjr.

06.28.2025