KUNG TAYO'Y MALULUGMOK
ni Gregorio V. Bituin Jr.
13 pantig bawat taludtod
di na mahaba-haba ang pakikibaka
kakaunti na lang ang nalalabing oras
maaring takipsilim ay mabanaag na
at ilang taon na lang tayo ri'y lilipas
at sa mundong ito'y magiging alaala
ngunit adhikain nati'y di maaagnas
kaya bago pa sumapit ang takipsilim
ay ialay na natin ang ating sarili
upang bigyang liwanag ang danas na dilim
upang ang sistemang sa ati'y bumibigti
upang kapitalismong nagdulot ng lagim
sa uring manggagawa'y tuluyang iwaksi
patuloy tayong kumilos, mga kasama
laban sa epidemya ng globalisasyon
laban sa yumuyurak sa dangal ng masa
laban din sa salot na kontraktwalisasyon
at laban din sa lipunang kapitalista
di tayo titigil sa pagrerebolusyon
iwawaksi natin ang bulok na sistema
pati lahat ng tipo ng diskriminasyon
patuloy na ipaglalaban ang hustisya
pati na rin karapatang pantao ngayon
huwag nang tumigil sa pag-oorganisa
palakasin natin ang ating mga unyon
kahit paminsan-minsan, nagsasaya tayo
lalo't sumapit ang panahong kapaskuhan
nang problema sa pamilya, unyon, gobyerno
ay ating pansumandaling makalimutan
mapapasabak muli pagkatapos nito
tila parang anestisya ang kapaskuhan
sasapit at sasapit itong takipsilim
upang tayo'y maging alaala na lamang
patuloy tayong kumilos kahit palihim
para sa sosyalismong adhika sa bayan
upang kung tayo'y malulugmok na sa dilim
ay mabanaag ang bagong kinabukasan
