Pusong Bato, Tulâ 1

‎PUSONG BATO, TULÂ 1

‎

‎narinig ko na ang awiting "Pusong Bato"

‎hinggil sa taong walang pakialam, bato

‎pusong kaytigas, tila di matibag ito

‎kawawà lang ang umiibig na totoo

‎

‎sa Bontoc, sa pinuntahan kong plasa rito

‎bago magpasa-Barlig, nilitratuhan ko

‎yaong inapakang totoong Pusong Bato

‎tunay na itsurang pusò ang batong ito

‎

‎- gregoriovbituinjr.

‎04.02.2026

‎

‎* kuha malapit sa istasyon ng Coda Lines bus sa Bontoc, Mountain Province

Di kumakain pag bibiyahe

DI KUMAKAIN PAG BIBIYAHE

‎

‎di kumakain pag bibiyahe

‎ganyan madalas yaong diskarte

‎magutom na, huwag lang magtae

‎kayhirap magtae sa biyahe

‎

‎ramdam ko man ang panggigipuspos

‎at tiyan ay parang kinakalos

‎huwag lamang magutom nang lubos

‎kakain na lang pagbaba ng bus

‎

‎batid ko na ang ramdam na umis

‎nangyari na itong ilang beses

‎huwag lang magtae, magtitiis

‎tubig lang, iihi pag iibis

‎

‎salamat at nakaraos pa rin

‎sa pupuntahan ay nakarating

‎

‎- gregoriovbituinjr.

‎04.02.2026

Coda Lines

CODA LINES

‎

‎kailangan ko nang umuwi ng Barlig

‎para sa huling ritwal sa namayapà

‎kong asawa, yaring puso'y nasasabik

‎buti't may pamasaheng bahid ay luhà

‎

‎dinaluhan muna'y taunang Kalbaryo

‎ng desaparesido, at nang matapos,

tinungo'y Coda Lines, wala pa umano

‎gabi pa ang biyahe ng anim na bus

‎

‎bumalik ng bahay, nag-ayos ng gamit

‎nasa terminal alas-singko ng hapon

‎inagahan ko at baka makasingit

‎fully-booked na, chance passenger na lang doon

‎

‎nagpalista, bakasakaling tawagin

‎dumating ang unang bus, di nakasakay

‎sa pangalawa't pangatlong bus, di pa rin

‎at sa pang-apat na bus na nakasakay

‎

‎salamat, Coda Lines, nakabiyahe na

‎sampung oras ding doon ay nakaupô

‎umalis ng alas-nuwebe y medya

‎alas-siyete y medya nang tumayô

‎

‎doon sa Bontoc na ako nag-agahan

‎isang kanin, isang karne, isang gulay

‎kaymahal na rin, presyo'y dalawang daan

‎matapos, sa dyip puntang Barlig sumakay

‎

‎- gregoriovbituinjr.

‎04.02.2026