Ano ba ang MU?

ANO BA ANG M.U.?

‎

‎Ano ba ang MU? Malagong Ubasan?

‎Masarap Upakan? Mandigma't Ubusan?

‎Magandang Ulitin? Mabisang Ulatan?

‎Makislap ang Ulo? Madaling Utusan?

‎

‎Mabuti't Umubra? Mahirap Umamo?

‎Makibaka'y Una? Makaiskor: Uno?

‎Masiglang Umupo? Madalas Umubo?

‎Madaling Uohan? Mag-Utos sa iyo?

‎

‎O nasa Manila University ka,

‎O ito'y Malabon University na,

‎O kaya'y Makati University pa!

‎At ang mas matindi, Miss Universe pala!

‎Bakit kailangan ang makipag-MU?

‎Makikipag-Ugnay sa ano bang isyu?

‎Mutual Understanding, sabi ng biyudo.

Matinong Usapan? Aba'y Maki-Uso?

- gregoriovbituinjr.

08.30.2026

Ayon kay Prof. Winnie Monsod

AYON KAY PROF. WINNIE MONSOD

aba'y talagang / tunay ang sabi / ni Profesora / Solita Monsod

trato sa tao'y / mga alipin / ng mga lider / na sampay-bakod

tinuring nilang / alipin yaong / dukha't obrerong / kayod ng kayod

habang gobyerno'y / sa kabang bayan / ay kurakutan / ang tinaguyod

ang mga ibon / ang gumagawa / ng batas para / sa mga isda

katotohanang / aking nabatid / noon pa mula / sa matatanda

ang dinastiya / ang lumilikha / ng mga batas / para sa madla

pag batas naman / sa manggagawa, / kapitalista / ang kumakatha

hindi ba't sila'y / magkakaiba, / at hindi sila / magkakauri

at ibon silang / kapitalista, / trapo, burgesya, / ang hari't pari

ang mga isda'y / tinatanggalan / ng ibon nitong / dangal o puri

kaya ang danas / na dusa't hirap / ng mga dukha'y / lalong sumidhi

O, mga isda, / baguhin nating / tuluyan iyang / sistemang bulok

at sama-sama / nating ilagay / ang mga dukha / doon sa tuktok

- gregoriovbituinjr.

08.30.2026

Pinaghalawan:

a) https://www.facebook.com/photo/?fbid=1505836601592755&set=a.637666555076435 

b) https://tribune.net.ph/2026/08/26/we-have-leaders-who-steal-from-us