Buwaya at buwitre

BUWAYA AT BUWITRE

di ako mapakali

sa mga nangyayari

buwaya at buwitre

pondo ang inatake

kawawa ang bayan ko

sa mga tusong trapo

ninanakaw na'y pondo

tayo na'y niloloko

sadyang kasumpa-sumpà

ang pinaggagagawâ

ng mga walanghiyâ

kayâ galit ang madlâ 

pinagsamantalahan

nila ang taumbayan

sila pang lingkod bayan

yaong mga kawatan

pangil nila'y putulin

kuko nila'y tanggalin

sistema nila'y kitlin

kahayupa'y katayin

tangi kong masasabi

ang punta ko'y sa rali

magpoprotesta kami

laban sa mga imbi

- gregoriovbituinjr.

10.28.2025

* litrato kuha sa baba ng Edsa Shrine, 10.24.2025

Sa bawat pagmu(muning) ginagawa

SA BAWAT PAGMU(MUNING) GINAGAWA

madalas nagmumuni kasama si Muning

pagmu(Muning) madalas gawin, tila himbing

nakapikit lang subalit ang diwa'y gising

nakatalungkô ngunit di nakagupiling

nagmumuni-muning tila nananaginip

samutsaring problema't isyu'y nalilirip

pangarap ay pag-asang walang kahulillip

nang bayang niloloko ng trapo'y masagip

mabuti't si Muning, ako'y di nakakalmot

habang kalmot ng kalmot ang mga kurakot

sa kaban ng bayan, di iyon malilimot

ng bayang binabahâ, dapat may managot

tulâ ang nililikha pagkat tula'y tulay

sa taumbayang talagang di mapalagay

kasama ko'y si Muning na alagang tunay

nasa bahay matapos sa labas tumambay

- gregoriovbituinjr.

10.28.2025

* mapapanood ang bidyo sa kawing na: https://www.facebook.com/reel/2053436362070633

Ang punò at ang dukhâ

ANG PUNÒ AT ANG DUKHÂ

putulin mo ang punò, may nananahang luluhà

paruparo, ibon, inakay na inaarugâ

tanggalan mo ng bahay, luluhà ang maralitâ

magulang, magkapatid, may tahanang mawawalâ

puno'y may ugat, sanga, bunga, dahong malalagô

sibakin mo't kalikasan ay tiyak manlulumò

bahay ay may ina, ama, anak, pamilyang buô

tanggalan mo ng bahay, baka dumanak ang dugô

pag nawalâ ang punò, babahain kahit bundok

tiyak guguho ang mga lupang magiging gabok

pag nawalan ng bahay, di iyon isang pagsubok

kundi ginipit ng mga mapaniil at hayok

ang punò at ang dukha'y para bagang magkapilas

na bahagi ng kalikasang iisa ang landas

idemolis mo't may dadanak na dugô at katas

kaya dapat asamin natin ay lipunang patas

- gregoriovbituinjr.

10.28.2025

Klima at korapsyon

KLIMA AT KORAPSYON

gusto ko talaga ang panahong

di ako nagdadala ng payong

kundi sumbrero ang pananggalang

sa kainitang nakadadarang

ngunit nagbabago na ang klima 

ang panahon ay di na matimpla

salà sa init, salà sa lamig

tag-init ngunit nangangaligkig

damang-dama ang katotohanang

di pala climate change ang dahilan

ng pagbaha kundi ghost flood control

bulsa ng kurakot nga'y bumukol

naglipana'y buwaya't buwitre

pondo ng bayan ang inatake

ang krimen nila'y nakamumuhi

salbaheng kay-iitim ng budhi

kongresong punô ng mandarambong

senadong kayraming mangongotong

mayaman nating bansa'y naghirap

pagkat namumuno'y mga korap 

- gregoriovbituinjr.

10.28.2025