Mansanas

MANSANAS

noong bata pa kami, si Ama'y may mansanas na bitbit

isang mansanas subalit hahatiin ng malililiit

para sa aming magkakapatid, sa akin ay malinggit

sa likod ng simbahan ng Bustillos, may Manzanas street

hanggang aking napagnilayang isang tula ang mabigkas

pagkat sa diwa ko't saloobin, ito ang inaatas

sa ganitong gawain, naging masikap ako't magilas

taludtod at saknong, tugma't sukat ang agad mamamalas

hanggang mahalukay sa diwa'y kasaysayan ng mansanas

kinain ni Adan ang mansanas na binigay ng ahas

kay Eva, sa ulo ni Newton may bumagsak na mansanas

ang kumpanya ni Steve Jobs, logo'y may kagat na mansanas

ngayon, sa aming mesita, may dalawa kaming mansanas

tatlo kami sa bahay, paano ko hahatiing patas

dalawang katlo o two-third, sa aritmetika'y lumabas

buti't sa pagkakahati nito, binahagi'y parehas

- gregoriovbituinjr.

12.29.2024

Biskwit na tipi

BISKWIT NA TIPI

nang minsang sa Balayan umuwi

sa lalawigan ng aking ama

sa bayan ay bumili ng tipi

na biskwit na hilig ko noon pa

wala kasing tipi sa Maynila

na kung meron, akin nang binili

pag nakita'y gagastusang sadya

pagkat diyan ako nawiwili

nang minsang aking ina'y dalawin

nagmano ako't kami'y nag-usap

tipi'y di ko nalimutang bilhin

nang umalis sa lupang pangarap

nagninilay ay lalantakan ko

ang tiping kaysarap na totoo

habang hinahabi'y tula't kwento

at may ilang binabasang libro

- gregoriovbituinjr.

12.29.2024

Lolo, todas sa Sinturon ni Hudas

LOLO, TODAS SA SINTURON NI HUDAS

nang dahil sa Sinturon ni Hudas

na tila ba nawala sa landas

buhay ng isang lolo'y nautas

limang araw pa bago natodas

sino bang sa paputok gumastos

mababayaran ba niyang lubos

yaong nangyaring kalunos-lunos

sa lolong pitumpu't walong anyos

nagbenta ng paputok na iyan

sa buhay mo'y walang pakialam

di ka sagutin ng mga iyan

pag nagtungo ka sa pagamutan

taospuso pong pakikiramay

sa pamilya ng lolong namatay

hibik ko sa kabila ng lumbay:

paputok ay iwasan pong tunay

- gregoriovbituinjr.

12.29.2024

* ulat mula sa pahayagang Bulgar, 29 Disyembre 2024, pahina 1 at 2

Larong Unblock

LARONG UNBLOCK

puzzle - six by six na parisukat

ay ilabas mo ang isang tipak

na kulay pula sa ilang tira

pag napalabas mo'y tagumpay ka

nakakatuwa ang larong yaon

pagkat isipan mo'y hinahamon

app game na Unblock sa iyong selpon

pag nagpahinga'y laro ko iyon

larong pampatalas ng isipan

pag-aanalisa't kaalaman

lohika'y ehersisyong mataman

sa ilang tira'y ilabas iyan

salamat naman sa larong Unblock

lalo na't nailabas ang tipak

pag nagtagumpay, ramdam mo'y galak

pagkat naglaro kang di nalubak

- gregoriovbituinjr.

12.29.2024

Idiskwalipika ang mga dinastiyang pulitikal

IDISKWALIPIKA ANG MGA DINASTIYANG PULITIKAL

kapag pulitikal na dinastiya

ang ibinoboto pa rin ng masa

hinahalal ba'y mapagsamantala

nariyan pa ba'y bulok na sistema

upang manalo pa sa pulitika

namumudmod ng pera sa kampanya

upang mabili ang boto ng masa

limang daang piso, bigas, ayuda

dinastiya pag ama ay senador

habang ina naman ay gobernador

ang anak nila sa bayan ay meyor

habang kongresista naman ang lolo

lider pa ng SK ang kanyang apo

at kapitan ng barangay ang tiyo

sigaw ng masa: idiskwalipika

iyang pulitikal na dinastiya

pawang galing sa iisang pamilya

yaong naghahari sa pulitika

matapos ang eleksyon, wala ka na

nalulong na sa bulok na sistema

sa susunod na halalan, huwag na

huwag iboto iyang dinastiya

- gregoriovbituinjr.

12.29.2024

* litratong kuha ng makatang gala