LIWAYWAY
kaysarap makatunghay
ng nobela, sanaysay
kwento'y mabasang tunay
sa magasing Liwayway
pagkat nananariwa
ang aking pagkabata
nahalina sa tula
at ngayon kumakatha
buti't may babasahin
tulad nitong magasin
na binibigyang-pansin
ang pagkamalikhain
dati ay linggo-linggo
bente pesos ang presyo
kada buwan na ito
at isangdaang piso
kahit na nagmahalan
ay sinusuportahan
pagkat ito'y lagakan
ng ating panitikan
baya'y di nagsasalat
kapag may nag-iingat
ng panitikang mulat
sa haraya'y dalumat
- gregoriovbituinjr.
02.10.2023
