Paghahanap ng sagot

PAGHAHANAP NG SAGOT

kung di magbasa'y nakatingala

sa langit ng kawalan at sumpa

paano ba tayo sasagupa

kung wala tayong alam sa hidwa

ng nagtutunggaliang puwersa

nitong uring mapagsamantala

marapat lang tayong makibaka

nang mabago ang imbing sistema

nais kong magbasa sa aklatan

ng matematika o sipnayan

ng kasaysayan ng sambayanan

ng paksang ekonomya't lipunan

pormula ba'y dapat sauluhin?

isyu't paksa ba'y kabisaduhin?

o mas dapat itong unawain?

kung bakit may ganyang suliranin?

nagbabakasakaling masagot

ang mga dahilan ng sigalot

nang baya'y mapalaya sa salot

na sistemang bulok at baluktot

- gregoriovbituinjr.

12.27.2022

Palaisipan

PALAISIPAN

samutsaring palaisipan

na sagot ay di na malaman

kailangang imbestigahan

bakit ganito'y nagsulputan

sinisira yaring daigdig

ng gahama't mapangligalig

paano sila mauusig

kung wala sa ating titindig

paano gaganda ang klima

kung coal plants ay tuloy ang buga

patuloy pa ang pagmimina

pagsunog ng fossil fuel pa

kinakalbo ang mga bundok

usok ay nakasusulasok

mga pulitiko ba'y bugok?

dahilan ng sistemang bulok?

ah, pangalagaan ang mundo

na tanging tahanan ng tao

kinabukasan ng kapwa mo

ay pag-isipan ding totoo

- gregoriovbituinjr.

12.27.2022

Malay

MALAY

bakit lagi kang nakikita sa tabi ng parang?

na mga likhang pain ay naroong nakaumang

bakit ka natumba, dahil ba sa bigat ng timbang?

kaya nilanggas ang sugat ng kawalan sa ilang

bakit laging nararanasan ay pagkatuliro?

dahil ba sa maghapong gawain at hapong-hapo?

bakit ang paraluman ay di mo na sinusuyo?

dahil ba naramdaman ay dusa't pagkasiphayo?

bakit nagbabagong klima'y nagdudulot ng sigwa?

tumitindi ang bagyong sa lungsod nagpapabaha

bakit kayraming pulitikong nagpapakatuta?

at sa buwis ng madla'y sadyang nagpapakataba

kayraming tanong na di agad basta nasasagot

lalo kung mapagsamantala ang nakapalibot

na sa salapi't kapangyarihan ay mapag-imbot

kaya bayan ay di makaahon, nakalulungkot

- gregoriovbituinjr.

12.27.2022