Paglisan sa Lias

PAGLISAN SA LIAS

lilisan muna pansamantala

upang magtungo sa kalunsuran

buhay na ito'y ganyan talaga

may nauuna, may naiiwan 

subalit ako'y magbabalik din

upang dalawin ang kanyang puntod

undas, bagong taon at bertdey din

kahit ang sapatos ko na'y pudpod 

bagamat di masabing paalam

kundi hanggang pagkikitang muli

maghihilom din ang pakiramdam

sa loob ma'y naroon ang hapdi

lilisan ngunit muling babalik

ang sa kwaderno'y isasatitik 

- gregoriovbituinjr.

06.27.2025

Pagkakape bago umalis

PAGKAKAPE BAGO UMALIS

narito't nagpainit ng tubig

upang magkape bago umalis

kapaligiran ay anong lamig

ngunit naligo rin at nagbihis

sadyang anong sarap ng sinangrag 

na aking kinape ng umaga

ramdam na ang loob ay panatag

habang nasa diwa'y sinisinta

tara, magkape bago lisanin

ang nayon patungong kalunsuran 

huwag ding kalimutang kumain

maglakbay ng may laman ang tiyan

salamat sa masarap na kape

pampagising lalo't bibiyahe 

- gregoriovbituinjr.

06.27.2025

* mapapanood ang bidyo sa kawing na: https://www.facebook.com/share/v/1Ceqf1uadF/ 

Kahig at tuka

KAHIG AT TUKA

inahin at kanyang inakay

ay kahig ng kahig sa lupa

pagkain ang hanap na tunay

silang sangkahig at santuka

sa kanila nga raw kinuha

yaong sikat na talinghaga

sa buhay ng dalitang masa

ang "isang kahig, isang tuka"

ako naman, aklat ko'y iba

ang "Isang Kabig, Isang Tula"

na paglalarawan sa dusa

ng maralita't manggagawa

ngayon ako nga'y napatitig

sa inahing kahig ng kahig

- gregoriovbituinjr.

06.27.2025

* mapapanood ang bidyo sa kawing na: https://www.facebook.com/share/v/12Mr64sdXUS/ 

Paruparong puti

PARUPARONG PUTI

paruparong puti ay aking nabidyuhan 

madaling araw noong nakipag-inuman

habang aking mata'y papikit-pikit naman

paruparong puti ba'y anong kahulugan?

siya ba'y tanda ng kaluluwang dumalaw?

siya ba'y nilalang na pangmadaling araw?

para sa tigib ng lungkot o namamanglaw?

isa ba siya sa mga diwatang ligaw?

paniniwala't pamahiing samutsari

na lumilitaw pag may nagdadalamhati 

iba't ibang kulay, may paruparong puti 

"Ikaw ba iyan?" sa labi ko'y namutawi

mabuti na lang at nabidyuhan ko agad

ang pagdalaw niya't mabilis na paglipad

sa pantalon ko pakpak niya'y inilahad

kaygandang mariposang sa akin napadpad 

- gregoriovbituinjr.

06.27.2025

* mapapanood ang bidyo sa kawing na: https://www.facebook.com/share/v/19K5FUycre/ 

Pulutang isda

PULUTANG ISDA

tumagay kaming pulutan ay isda

pritong galunggong o kaya'y tilapya

madaling araw ito ang ginawa

habang kwatro kantos ang tinutungga

ulam: galunggong kaninang umaga

kahit tanghali, ulam pa rin siya

kahit hapon, iyon pa rin talaga

pagdating ng gabi'y pinulutan na

kaysimple lang ng buhay, may tanggero

kaylumbay man ng nararamdaman ko

mahalaga'y makisamang totoo

sa kamag-anakan ni misis dito

pakikisama'y sadyang importante

sa panahon ngayong di mo masabi

ngunit patuloy na tutula kami

lalo na't pagtula sa kinakasi

- gregoriovbituinjr.

06.27.2025

Pagtagay

PAGTAGAY

nakita ko silang tumagay

bihira man akong bumarik

habang nadarama ang lumbay

nanilay ay sinasatitik

kwarto kantos tinagay namin

silang sa lamay nagsitulong

kamag-anak ni misis man din

na kasama pa hanggang ngayon

di gaya doon sa Maynila

pinapaikot ng tanggero

dito'y tatagay ka lang sadya

kung gusto, kanya-kanyang baso

tanging masasabi'y salamat

sa katagay, sa lahat-lahat

- gregoriovbituinjr.

06.27.2027