Huwag kang mandaya

“I would prefer even to fail with honor than win by cheating.” ~ Sophocles

parating muli ang pagsusulit sa paaralan

parating muli ang halalan at magbobotohan

upang makapasa'y mandadaya't magkokopyahan

upang manalo ang manok, mandaraya na naman

gagawa ng paraan upang sila'y makapasa

imbes na magsunog ng kilay o magrebyu sila

katabi'y kakalabitin upang makapangopya

o nakasulat na sa munting papel ang pormula

maliit lang ang sweldo'y nag-aagawan sa pwesto

kongresista, senador, pangulo'y magkanong sweldo

anong prinsipyo ito't sa pwesto'y nagkakagulo?

kapag ba nakapwesto, may proteksyon ang negosyo?

mabuti nang mabigong ang pagkatao'y may dangal

kaysa mandaya't manalong dangal mo'y nasa kanal

mabuting magsikap, magtagumpay sa pagpapagal

kaysa manalong sarili'y tinulad sa pusakal

- gregbituinjr.

* Nalathala sa publikasyong Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Agosto 1-15, 2019, p. 20

Maralita raw ang nagdudumi sa mga ilog

maralita raw ang nagdudumi sa mga ilog
ilog raw ay sa mga basura pinalulubog
papayag ka bang maralita'y diyan mapabantog
pagkat walang disiplina't laging patulog-tulog

lagi nilang pinagbibintangan ang maralita
sanhi raw sila ng pagdumi ng ilog, pagbaha
mangmang daw kasi't walang pakialam itong dukha
silang madaling masisi, iba man ang maygawa

O, maralita, payag ka bang laging sinisisi?
ikaw lang kasi ang nakita nilang bulnerable
madaling sisihin pagkat buhay mo'y miserable
dukha'y mababa raw ang pagkatao't walang silbi

bumangon ka, maralita, tirisin ang gahaman
lumaban ka, dukha't inyong baguhin ang lipunan

- gregbituinjr.

Mga Lider-Maralita

MGA LIDER-MARALITA

mga lider-maralita'y dapat maging matatag

nang di makimi sa demolisyon, bagkus pumalag

mga pandarahas sa kanila'y dapat mabunyag

ang mawalan ng bahay ay isdang pupusag-pusag

kayhirap kung dukha'y isdang mawawalan ng hasang

dahil ba maralita'y basta na lang tinotokhang?

dahil ba sila'y dukha, ang tingin agad ay mangmang?

dahil ba mahirap, madali silang nalilinlang?

magkaisa, magtulungan laban sa demolisyon

walang mang-iiwan, magtatag ng organisasyon

bawat isa'y mag-usap at makipag-negosasyon

ipagtagumpay ang laban hanggang sa relokasyon

pampublikong pabahay, maralita'y nais ito

pabahay ay karapatan, huwag gawing negosyo

ang dapat mangasiwa ng pabahay ay gobyerno

dukha'y uupa lang ayon sa kakayahan nito

dapat matatag ang mga lider ng maralita

sila'y makipagkaisa sa uring manggagawa

kalunus-lunos man ang lagay, di dapat lumuha

sila'y tumindig nang sa lipunang ito'y lumaya

- gregbituinjr.

* Nilikha sa pulong ng Pambansang Konseho ng mga Lider (National Council of Leaders) ng Kongreso ng Pagkakaisa ng Maralitang Lungsod (KPML) na naganap noong Agosto 2-4, 2019