nakatapak pa rin ako sa lupa
na sa pagtatrabaho'y kandakuba
pilit inaabot ang mga tala
na ikukwintas sa mutyang diwata
ako man ay Bituing walang ningning
na sa langit ay walang makasiping
aking mga mata'y di nakapiring
dama't dinig ang masang dumaraing
maputik ang daan kong nilalandas
upang makamit ang lipunang patas
upang kawalang hustisya'y magwakas
at madama ang pag-ibig na wagas
di pa rin tumitigil sa pagkilos
organisahin ang naghihikahos
upang sistemang bulok na'y matapos
upang labanan ang pambubusabos
patuloy din ako sa pangangarap
na malansag na iyang pangongorap
upang mga dukha'y di na maghirap
kundi asam na ginhawa'y malasap
- gregoriovbituinjr.
06.24.2022
