Trabaho kong maghabi ng salitâ

‎TRABAHO KONG MAGHABI NG SALITÂ

‎

‎bilang manunulat, bilang makatâ

‎trabaho kong maghabi ng salitâ

‎isyu'y ipinararating sa madlâ

‎mga inakda'y inilalathalà

‎

‎madalas, kinakatha'y kwento't tulâ

‎minsan naman, lilikhâ ng pabulâ

‎nobela nama'y pangarap maakdâ

‎sa pahayagan ay nangangasiwa

‎

‎tutula't tutulâ kahit tulalâ

‎nais kong bawat araw ay may tulâ

‎at sana'y maisaaklat ang akdâ

‎na sana'y mapagkaperahang lubhâ

‎

‎trabaho kong kumathâ ng kumathâ

‎mangalap ng mga isyu't balità

‎kinakatas anumang nasa diwà

‎ganyan ang sa araw at gabi'y gawâ

‎

‎- gregoriovbituinjr.

‎03.28.2026

Salamat sa saging at itlog

SALAMAT SA SAGING AT ITLOG

matapos ang Kalbaryo ng Maralita

ay pinabaunan ng saging at itlog

di nakain sa rali, inuwing sadya

pagkain ngayong umaga at nabusog

salamat sa kasamang nagbigay niyon

na dapat ay kahapon ko pa kinain

salamat at ako'y may almusal ngayon

ako'y pinalakas ng itlog at saging

buti't naalalang nakalagay sa bag

kaya daga'y walang makain kagabi

inilagay agad sa ref ng magdamag

bagamat may pusa, di siya mahuli

at muli, salamat sa mga kasama

talagang kasangga sa pakikibaka

- gregoriovbituinjr.

03.28.2026