Happy civil wedding anniv, mahal ko

HAPPY CIVIL WEDDING ANNIV, MAHAL KO

oo, kinasal kami ng Araw ng mga Puso

kasabay ng limampu't walo pang magkasintahan

binasbasan ng alkalde, Araw ng mga Nguso

pagkat naghalikan sa nasabing kasalang bayan

happy wedding anniversary, mahal kong diwata

patuloy ang pagsinta ng irog mong mandirigma

patuloy man akong lingkod ng uring manggagawa

at sekretaryo heneral ng samahang dalita

di ako magpapabaya sa tahanan, O, irog

guminhawa man ang buhay o umaalog-alog

magsisikap tayo upang marating ang tugatog

ng tagumpay kahit ang araw natin ay lumubog

muli, Happy Civil Wedding Anniversary, mahal

bagamat pangunahing bilihin ay nagmamahal

- gregoriovbituinjr.

02.14.2024

Expired ngayong Araw ng mga Puso

EXPIRED NGAYONG ARAW NG MGA PUSO

nilitratuhan ko ang nakasulat

na expiration ng isang tinapay

ngayong Araw ng mga Puso pala

ang petsa, kaya dapat kainin na

nakita iyon sa isang lamesa

na tila baga kaysarap ng lasa

ngayong araw ang expiry date niya

kasabay nitong araw ng pagsinta

ma-expire man ang tinapay, sige lang

basta di ang puso o ang pag-ibig

dahil habambuhay ang pagniniig

ng dalawang pusong di palulupig

tinapay, may expiration, subalit

di ang pagsinta, pagkat ito'y higit

na matimbang, puso'y may malasakit

lalo't pagsinta'y kusa, di pinilit

- gregoriovbituinjr.

02.14.2024

Ang kyut na kuting

ANG KYUT NA KUTING

nabidyuhan muli ang kyut na kuting

na aking nasilayang bagong gising

kanina nga siya'y himbing na himbing

habang ako ay may kinukutinting

kampante, parang di ako nakita

o nais kinukunan ng kamera

para bang ikinatutuwa niya

na ako nama'y di nakagambala

baka siya'y may kung anong naisip

baka natandaan ang panaginip

tila di maunawa ang nalirip

buti't ginising ko't siya'y nasagip

O, alagang kuting, pahinga muna

mamaya na lang, maglalaro kita

- gregoriovbituinjr.

02.14.2024

* ang bidyo ay mapapanood sa kawing na: https://www.facebook.com/reel/1475237340088784