Huwag sayangin ang panahon

HUWAG SAYANGIN ANG PANAHON
ni Gregorio V. Bituin Jr.
15 pantig bawat taludtod

"Huwag mong sayangin ang panahun: ang yamang nawala'y mangyayaring magbalik; ngunit panahung nagdaan na'y di na muli pang magdadaan." ~ mula sa Kartilya ng Katipunan

ang bawat sandali'y dapat laging pahalagahan
magagawa ngayo'y huwag ipagpabukas na lang
mahirap kung lagi nating ipinagpapaliban
ang kayang magawa't matapos sa kasalukuyan

bumulong man ang hangin sa kanan man o kaliwa
may pakpak man ang balita't may tainga ang lupa
sa paggawa ng kabutiha'y huwag magsasawa
lalo't may panahong may kinakaharap na sigwa

may panahong mag-aatubili o magpapasya
di na magbabalik ang panahong kamusmusan pa
na maiisip lang pag kabataa'y naalaala
at sasabihing may iling, "Sayang, noon pa sana!"

huwag sayangin ang panahon, Kartilya'y nagbilin
na sa bawat puso't isip ay ating patagusin

Anuman ang kulay ng balat

ANUMAN ANG KULAY NG BALAT
ni Gregorio V. Bituin Jr.
15 pantig bawat taludtod

"Maitim man at maputi ang kulay ng balat, lahat ng tao'y magkakapantay: mangyayaring ang isa'y higtan sa dunong, sa yaman, sa ganda, ngunit di mahihigtan sa pagkatao." - mula sa Kartilya ng Katipunan

malalim, sadyang tumatagos sa kaibuturan
pag Kartilya ang Katipunan ay naunawaan
dinadalisay nito'y pagkatao't kalooban
na armas sa maraming tunggalian sa lipunan

ang pagpapakatao'y binibigyan ng halaga
pakikipagkapwa'y dapat tagos sa kaluluwa
maging mabuti sa kapwa'y isabuhay tuwina
upang pakikitungo'y magbubunga ng maganda

anuman ang kulay ng balat ng tao sa lupa
sila'y ating kapwa, kapwang dapat inaaruga
sapagkat may pagkatao ring tunay na dakila
dapat pantay at walang sinumang nagdaralita

taos-pusong sundin ang nilalaman ng Kartilya
igalang natin ang pagkatao ng bawat isa

Halik ng Truncheon

HALIK NG TRUNCHEON

ni Gregorio V. Bituin Jr.

11 pantig bawat taludtod

nakaharang muli ang mga truncheon

nitong parak sa mga raliyista

nilulunsad na raw yata'y rebelyon

gayong sila lang ay nagpoprotesta

mataas na ang presyo ng bilihin

gayong di naman tumaas ang sweldo

mahal na ang pamasahe't pagkain

kuryente, tubig, bahay at petrolyo

ikaw na lang ba'y tutunganga na lang

o sasama ka sa pagpoprotesta

trucheon, kanyon man ang nakahambalang

di tayo matatakot makibaka

ang pagrarali'y ating karapatan

kahit pa mukha nati'y magkadugo

o magkapasa ang ating katawan

kahit humalik ang truncheon sa bungo

karapatan natin ang magprotesta

kung walang ginagawa ang gobyerno

kundi lalong pahirapan ang masa

sistemang ito'y dapat nang mabago

Di Na Uso ang mga Supremo

DI NA USO ANG MGA SUPREMO

ni Gregorio V. Bituin Jr.

10 pantig bawat taludtod

i.

ang Supremo noon ay kinatay

ng mga kasama sa Kilusan

hinatulang ibaon sa hukay

kakampi'y tinuring na kalaban

ganyan ang kwento ni Bonifacio

nang makalaban si Aguinaldo

ii

di lang agawan sa pamumuno

marahil ang isyu nila noon

kundi ang ugali ng pinuno

na akala mo'y kung sinong maton

nangyari na iyon sa Tejeros

nang Supremo'y magwala ng lubos

iii.

kasamaha'y totoong nabigla

rebolber niya'y binubunot na

ganito pala ito magwala

buti na lang at naawat siya

siya'y pinagpasyahang ipiit

kasama pati kanyang kapatid

iv.

bago pa sumugod ang Kastila

ay dinala na sila sa labas

tinangka nilang maging malaya

ngunit sila'y agad na nautas

ang mga kapwa Katipunero

ang pumaslang mismo sa Supremo

v.

di na uso ang Supremo ngayon

baka maulit ang kasaysayan

pagkat nagbabago ang panahon

di tulad niya ang kailangan

dapat pamumuno'y kolektibo

at di diktadurya ng Supremo

* pinatay si Andres Bonifacio, kasama ang kapatid na si Procopio, noong Mayo 10, 1897 sa Bundok Buntis, Maragondon, Cavite

Di Tayo Isinilang Para Sumunod Lang

DI TAYO ISINILANG PARA SUMUNOD LANG

ni Gregorio V. Bituin Jr.

13 pantig bawat taludtod

di tayo isinilang para sumunod lang

o kaya'y para lang alipinin ninuman

bawat isa sa atin ay may karapatang

ituring na kapwa ng sinumang nilalang

kung sakaling isinilang tayong mahirap

huwag pumayag apihin ng mapagpanggap

magtulungan tayong abutin ang pangarap

na lipunang makatao sa hinaharap

dahil ba isinilang tayong maralita

karapatan na nilang apihin ang dukha?

ituturing pa nila tayong hampaslupa

tayo naman payag apihin ng kuhila

bawat isa'y may kalayaan nang isilang

di para maging alila't tagasunod lang

at kung nabuhay tayong iyan ang dahilan

buhay pala natin ay walang katuturan

di tayo alipin ninuman, tao tayo

kung alipin ang marami sa mundong ito

aba'y kumilos na tungo sa pagbabago

pagkat isinilang tayong malaya dito

kilalanin natin ang ating karapatan

kaya dapat lang matuto tayong lumaban

suriing mabuti ang ating kalagayan

matatantong di natin ito kapalaran

Patuloy ang Paglalayag

PATULOY ANG PAGLALAYAG

ni Gregorio V. Bituin Jr.

12 pantig bawat taludtod

patuloy pa rin ang aking paglalayag

kung saan-saan na ako naglagalag

upang hanapin kung sinong aking liyag

upang makilala ang magandang dilag

sino kaya itong aking pinangarap

sana'y makita ko na sa hinaharap

sa maraming taon nitong paghahanap

aking natagpuan siya't nakaharap

nakita ko siya't puso ko'y pumintig

pintig na kaylakas at dinig na dinig

sa magandang dilag agad napatitig

at naramdaman kong siya'y iniibig

sadyang kayganda ng kanyang mga ngiti

sa kanya nga'y tiyak di ako hihindi

pag nabigo ako'y maglalayag muli

doon sa kawalang walang pagkamuhi

Ang Magpapasya

ANG MAGPAPASYA

ni Gregorio V. Bituin Jr.

12 pantig bawat taludtod

sabi ko sa iyo, minamahal kita

at di ko sinabing mahalin mo ako

pagkat sa puntong 'yan, ikaw ang magpasya

ninais mo rin bang ako'y ibigin mo?

Isa Kang Palaisipan

ISA KANG PALAISIPAN

ni Gregorio V. Bituin Jr.

11 pantig bawat taludtod

sa akin, isa kang palaisipan

di ka naman gaanong kagandahan

di naman seksi ang iyong katawan

di perpekto ang iyong katauhan

ngunit inibig kita ng tuluyan

at tinanggap ko maging sino ka man

sa iyo, ako ba'y palaisipan?

kahit na di gaanong kagwapuhan

kahit na katawan ko'y katamtaman

kahit di perpekto ang katauhan

ako kaya'y iyong maiibigan?

at matanggap na maging kasintahan?

Sisikat Pa ang Araw Bukas

SISIKAT PA ANG ARAW BUKAS

ni Gregorio V. Bituin Jr.

9 pantig bawat taludtod

kung sa ulo mo'y bumubutas

ang mga problemang marahas

tandaang iya'y lumilipas

iyo din iyang malulutas

mag-iwan man ito ng bakas

sisikat pa ang araw bukas

Kung Paano Di Na Libakin

KUNG PAANO DI NA LIBAKIN

ni Gregorio V. Bituin Jr.

9 pantig bawat taludtod

ang tao raw na walang pilak

ay parang ibong walang pakpak

kaya madalas nililibak

at lagi na lang hinahamak

kung ituring parang di tao

api ang pakiramdam nito

parang tao'y laging may presyo

kaya dapat gawin ba'y ano

kaya nasa isipan niya

magtotodong trabaho siya

dahil pag siya'y nagkapera

di na hahamakin ng iba

pera lang pala ang katapat

nang di na apihin ng lahat

kahit ang trabaho'y kaybigat

basta kunwari bulsa'y bundat

Ang Nais ng Batang Lansangan

ANG NAIS NG BATANG LANSANGAN

ni Gregorio V. Bituin Jr.

8 pantig bawat taludtod

buhay ba'y lagi nang ganyan

sabi ng batang lansangan

"araw-araw kagutuman

pamana ba'y kahirapan

ano bang pamamaraan

upang aking maiwasan

ang danas na kasalatan

at akin namang matikman

ang nasang kaligayahan

nais ko namang gumaan

itong aking kalagayan

a, ako'y maninilbihan

at aking pagsisikapang

magkatrabahong tuluyan

kahit maging alipin man

ng kung sinong mayayaman

tatanggapin kaya naman

ang tulad kong dukha lamang

o ako'y paglalaruan

at pagtatawanan lamang

basta aking susubukan

na magkatrabaho naman

di nga ba't may kasabihan

pag aking pinagsikapan

meron ding kapupuntahan

kapag pinangatawanan

pangarap ko'y makakamtan

basta't hindi sapilitan"

Dyaryo at Dyarista

DYARYO AT DYARISTA

ni Gregorio V. Bituin Jr.

13 pantig bawat taludtod

doon natititik ang mga insidente

nakatala sa dyaryo'y isyu't pangyayari

balita sa sambayanan ba'y anong silbi

para ba mabatid kung sinong nanalbahe

para ba maiwasan yaong mga imbi

para ba mayroong maikwento't masabi

ang panitik ng dyarista'y di napipipi

balitang nasagap ay di sinasantabi

agad na susundan, sila'y dumidiskarte

sinusulat agad kahit anong mangyari

balita ang kanilang ipinagbibili

dito sila nabubuhay at nagsisilbi

Hampaslupa at Dakila

HAMPASLUPA AT DAKILA

ni Gregorio V. Bituin Jr.

Hampaslupa ba'y kilala ng mga dakila

Maari bang dakilain ang mga hampaslupa

Pagkahampaslupa ba'y pagkadakila

Dahil isinilang na walang-wala

Walang saplot nang isilang

Walang sariling tahanan

Walang karapatan

Kung wala siyang karapatan

Bakit siya dakila

O dahil walang karapatan

Kaya siya hampaslupa

O ang mga hampaslupa'y

Alipin ng dakila

Di Bayani ang Diktador

DI BAYANI ANG DIKTADOR

ni Gregorio V. Bituin Jr.

di bayani ang diktador

na nagbaba ng martial law

at siyang dahilan

ng kamatayan ng marami

ng pagkawala ng maraming buhay

ng pagdukot sa mga aktibistang

di pa nakikita hanggang ngayon

di bayani ang diktador

na sumira sa buhay ng marami

na bumaboy sa karapatang pantao

na nagwasak sa dignidad ng kapwa

na nangutang ng nangutang

hanggang sa di ito mabayaran

at ngayon, nais ng maraming kongresista

na gawing bayani ang diktador

sa anong mga dahilan

upang matapos na ang kaguluhan?

upang burahin ang kanyang kamalian?

upang tuluyang baguhin ang kasaysayan?

o mga kongresistang ito'y nabayaran?

bakit ihahanay ang diktador

sa pagkilala kina Rizal?

Bonifacio at Ninoy Aquino?

nasaan na ang kanilang talento?

nasaan na ang kanilang puso?

nasaan na ang kanilang budhi?

wala ba silang aral sa kasaysayan?

binabastos nila ang sambayanan

o nais nilang tayo ay pagtawanan

ng mga kalapit bansa sa silangan

ng mga kapitalistang bansa

ng mga dating pangulo ng bayan

o nais nilang tayo'y maging luhaan

dahil wala pa ring katarungan

dahil di pa makita ang mga desaparesidos

dahil buburahin ang gunita ng bayan

di dapat pumayag ang mga matitino

di dapat sumang-ayon ang sambayanan

di tayo dapat pumayag, mga kababayan

na bayani na pala

ang nangurakot sa kabangbayan

ang dahilan ng kamatayan ng marami

ang dahilan ng pagkawala ng marami

ang sumira sa buhay ng masa

ang bumaboy sa karapatang pantao

ang nagwasak sa dignidad ng kapwa

di bayani ang diktador

di bayani si Marcos

Ehersisyo ng Sinta

EHERSISYO NG SINTA

ni Gregorio V. Bituin Jr.

Natanaw muli kita

Nag-eehersisyo

Patakbu-takbo

Pabali-bali ng balakang

Dahil nais mong mawala

Ang kaunting taba

Ang matambok na bilbil

Na nagpawala sa iyong

Kaseksihan

Aliw na aliw ako

Habang kita'y minamasdan

Maganda ka pa rin naman

Kahit tumaba ng bahagya

Kahit di gaanong seksi

Kahit may bilbil sa tiyan

Ang importante'y ikaw pa rin iyan

Di nagbabago ang pagtingin ko sa iyo

Dahil sabi ng puso kong hibang

Tumaba ka man o pumayat

Ikaw pa rin iyan

Di nito binabago

Ang pagtingin ko sa iyo

Dalumat kong magtatagumpay ka

Sa iyong pagtityaga

Sana'y magtagumpay ka

Kalusugan o Kalasugan?

KALUSUGAN O KALASUGAN?

ni Gregorio V. Bituin Jr.

10 pantig bawat taludtod

kailangan ng kababaihan

ang reproduktibong karapatan

ngunit ayaw nitong kaparian

na ang babae'y maprotektahan

labing-isang ina bawat araw

pagkapanganak ang namamatay

ano bang nais ng kaparian

kamatayan ng kababaihan?

wala nga ba silang pakialam

sa babaeng dapat protektahan

labing-isang ina bawat araw

pagkapanganak ang namamatay

kalusugan at di kalasugan

ang reproduktibong karapatan

babae'y dapat pangalagaan

at huwag dalhin sa kamatayan

dapat ang babae'y di malasog

sila dapat ay maging malusog

ipasa ang panukalang batas

nang mapigilan ang pagkautas

ng mga nanganak ng di oras

ito'y makakatulong na lunas

pag nangyari'y mapipigilan na

ang pagkamatay ng mga ina

Di sapat ang mabuting puso lang ng pulitiko

DI SAPAT ANG MABUTING PUSO LANG NG PULITIKO
ni Gregorio V. Bituin Jr.
15 pantig bawat taludtod

gaano man kabait itong mga pulitiko
na sa masa'y nangako ng tunay na pagbabago
marami pa ring maghihirap sa lipunang ito
dahil ang kalagayan ngayon ay kapitalismo

mangangako sila ng pabahay sa mga dukha
itataas daw ang sahod ng mga manggagawa
at may libre pang gamutan para sa maralita
may libre din silang pakain sa mga kawawa

sapat bang may mabuting puso yaong pulitiko?
sapat bang maging mabait ang isang kandidato?
kaya bang sabay-sabay bumait ang mga trapo?
sa kalooban ba ang umpisa ng pagbabago?

di ba't may batayan kung bakit ganid ang sistema?
di ba't ang naghahari'y ang may-ari ng makina?
di ba't desisyon ay nasa may-ari ng pabrika?
di ba't nag-aari ng lupa'y siyang mapagpasya?

di ba't kapangyarihan ay nasa mga may-ari?
ng kagamitan sa produksyon, sila yaong hari?
di ba't sila ang sa manggagawa'y nang-aaglahi?
di ba't ang mga may-ari ang naghaharing uri?

paano sasabay sa sistema ang kabaitan?
kung sa kalakalan, sila-sila'y nagsasagpangan?
kung una lagi'y tubo, sa tubo'y nag-uunahan?
kung ang trapo'y elitistang nasa pamahalaan?

gaano man kabait silang mga pulitiko
at laging nasasapuso'y paglilingkod sa tao
di pa rin uubra pag sistema'y kapitalismo
sistemang ito'y sagpangan, may panalo't may talo

tanggalin ang batayan ng naghaharing sistema
dapat nang wakasan ang pag-aari ng makina
gawing sosyalisado ang mga lupa't pabrika
upang kasuwapangan sa tubo'y di na umubra

Ang Nagbibingi-bingihan

ANG NAGBIBINGI-BINGIHAN

ni Gregorio V. Bituin Jr.

10 pantig bawat taludtod

nagbibingi-bingihan na naman

sinasabi mo'y ayaw pakinggan

tambak na yata ang luga niyan

tenga niya'y dapat malinisan

at baka makarinig na iyan

ang tinig mo'y naririnig niya

labas-masok lang sa kanyang tenga

ngunit walang pakialam baga?

para siyang dyipning di mapara

dahil nawalan ng preno pala?

di naman bingi ang isang iyan

lagi nang nagbibingi-bingihan

kausapin nyo ng masinsinan

baka naman siya'y matuluyan

at tuluyang di tayo pakinggan

Ang Tulog at ang Bingi

ANG TULOG AT ANG BINGI

ni Gregorio V. Bituin Jr.

8 pantig bawat taludtod

sadyang mahirap gisingin

ang nagtutulug-tulugan

ilang beses mang yugyugin

di rin magigising iyan

dahil gising na ang hayop

mahirap ding kausapin

ang nagbibingi-bingihan

pagsamo mo'y di diringgin

maglupasay ka man diyan

kahit dinig ka ng hayop

Hurado pa rin

HURADO PA RIN
ni Gregorio V. Bituin Jr.
8 pantig bawat taludtod

di ang mga manonood
ang maghuhusga ng laban
tagabuyo lamang sila
sa mga nagsasalpukan

mga hinihiyaw nila
kung anong dapat mong gawin
habang sila'y tuwang-tuwa
kahit na duguan ka na

nagbayad kahit magkano
upang mapanood ka lang
kung paano mo gapiin
yaong iyong kinalaban

suntok, takbo, hingal, bayo
amba, bayo, suntok, takbo
ang buhay nila'y ganito
nilang mga boksingero

patulugin ang kalaban
sa panga'y iyong upakan
manonood na'y sigawan
magugulo't palakpakan

ang tanging magpapanalo
sa laban mo'y hindi sila
di ang mga manonood
na akala mo'y sadista

ngunit kung walang tumumba
manghihinayang na sila
ibalik daw tiket nila
gayong iyong pinasaya

ang lahat na'y ginawa mo
nang masungkit ang panalo
ngunit kaytitibay ninyo
sa labang umatikabo

gayunman, sa dulo pala
hurado ang magpapasya
anumang desisyon nila'y
dapat igalang ng masa

Busog sa Hirap

BUSOG SA HIRAP

ni Gregorio V. Bituin Jr.

10 pantig bawat taludtod

busog sa hirap ang maralita

busog tatlong beses bawat araw

busog sa kawalan silang dukha

busog kaya lagi ang palahaw

Binhi ng Rebelyon

BINHI NG REBELYON

ni Gregorio V. Bituin Jr.

8 pantig bawat taludtod

ihasik natin ang binhi

ng rebolusyon ng bayan

itindig natin ang puri

ng kapwa sa daigdigan

iwaksi ang pag-aari

na sanhi ng karukhaan

organisahin ang uri

upang lumaya ang bayan

Ang tsinelas at ang magkapareha

ANG TSINELAS AT ANG MAGKAPAREHA
ni Gregorio V. Bituin Jr.
13 pantig bawat taludtod

ang tsinelas ay tulad din sa mag-asawa
walang silbi 'yung isa kung wala ang isa
kaya pag pag-ibig mo'y natagpuan mo na
aba'y huwag na siyang pakakawalan pa

bago man ang sapatos, kayganda ng balat
tingin mo ito sa iyo'y tama ang sukat
pag-uwi'y hahanapin pa rin ay tsinelas
kinasasabikan natin ito ng ganap

tulad din ng pinipintuho mong dalaga
pag kayong dalawa'y naging magkapareha
walang iwanan, pares na kayong dalawa
walang silbi 'yung isa kung wala ang isa