ni Gregorio V. Bituin Jr.
13 pantig bawat taludtod
ang sabi ng pantas, magpakabuting sadya
ituring na kapatid bawat manggagawa
na sa buhay ay nangunguna sa paglikha
ng samutsaring bagay sa balat ng lupa
likha ng manggagawa anumang pag-unlad
sa ekonomya man, pulitika't katulad
pag-unlad ay di likha ng burgesyang tamad
kundi ng manggagawang may lipak ang palad
silang mga manggagawa ang puno't dulo
ng mga nalikhang yaman sa buong mundo
kung walang manggagawa, nasaan na tayo
baka naroon pa sa panahon ng bato
