sepulturero akong handa nang maghukay
sa lupang nilalason ng toksikong bangkay
nais mo bang makiisa sa pagsisikhay
upang iwasto ang kasaysayang binistay
ng mga ulupong na nanalasang tunay
tapos na ang lamay, marapat lang hukayin
ang mapagsamantala sa lahing magiting
ibalik sa dating libingan ang salarin
nang diwa nito'y di na makapang-alipin
kasaysayang dinuhagi’y iwasto natin
- gregbituinjr.
