Munting sulyap sa talambuhay

tatlong taon ding naging machine operator noon

tangan ko'y makina, manggagawang regular doon

nag-resign, nag-aral, b.s. math ang kinuhang iyon

naging manunulat pangkampus ng apat na taon

di pa editor nang sumumpa't niyakap ang layon

di nagtapos, nag-pultaym, iyan ang aking kahapon

wala na sa isip ang aming pinag-aaralan

kaya nagpasya akong makibaka ng tuluyan

sa campus paper ay mababasa ang pasyang iyan

at umalis sa apat na sulok ng pamantasan

nasa isip lagi'y ang kinabukasan ng bayan

inaral ang sistema, rebolusyon at lipunan

dugo'y mainit noon laban sa pambubusabos

kumampi sa pinagsasamantalahan at kapos

pag pulong, malayo'y nilalakad, walang panustos

at tinitiis ang gutom dahil walang panggastos

aral sa matematika, pati buhay tinuos

at nilulubos ang aldyebra sa buhay kong kapos

ikinasal kaya may asawang naging kaakbay

hinarap ang sinasabing bago ko raw na buhay

habang ang prinsipyo'y tangan pa rin sa bawat lakbay

sa problema't paglutas ng problema na'y nasanay

patuloy lang gawin ang misyon ko't tungkuling taglay

kung sa pakikibaka'y nawalay, ako na'y patay

- gregbituinjr.

05.04.2020

Tigil daw muna ang produksyon

bumalik ang sigla ko bilang dating manggagawa

nang gadgarin itong karot na kusa kong ginawa

alalayan si misis sa proyekto naming handa

ang pinulbos na karot na ibebenta sa madla

sampung malaking karot bawat araw ang kota ko

sinubukan muna, dalawang araw nang ganito

dalawampung karot sa dalawang araw na ito

upang makarami'y kinse na kaya ang gawin ko

kayraming nakabilad, dinadapuan ng langaw

para bang uulan, araw ay lumubog-lumitaw

tama na muna, si misis ang sa akin ay hiyaw

tigil muna ang produksyon, sa akin ay malinaw

sa bawat araw, prinograma ko na ang gagawin

sampung karot tuwing umaga ang kukudkurin

bilang manggagawa, ang target kong kota'y tungkulin

sigla bilang dating obrero'y nagbalik sa akin

konti lang ang nakabilad, tigil na ang produksyon

habang nasa antas kami ng eksperimentasyon

sa pag-aaral ng pulbos na karot nakatuon

tagumpay nito nawa'y kamtin namin pag naglaon

- gregbituinjr.

Ang kinayod kong karot

kalahating batya ang kinayod kong sampung karot

kaysarap pagmasdan habang sa ulo'y kumakamot

dapat maligo matapos magkayod, aking hugot

habang mamaya'y mag-uulam ng talbos at hawot

kahapon ay sampung malaking karot, ngayon uli

sinimulan ko nang matapos makapananghali

di ko man mapuno ang batya, kahit kalahati

kayod ng kayod, gadgad ng gadgad, paunti-unti

sa umaga, maggadgad muna ng karot ang gawa

sa tanghali, magluluto, kakain, titingala

sa langit upang pagnilayan ang anumang paksa

sa hapon, patuloy ang gawa, sa gabi'y pagkatha

matapos maggadgad, linisin lahat ng ginamit

kaldero, pinggan, panggadgad, batya, silya'y iligpit

maayos ang maghapon, magdamag nama'y pusikit

randam ay maaliwalas, kahit na nanlalagkit

- gregbituinjr.

Walang asukal sa kape

kung may asukal pangkape, ilagay nang sumarap

kung walang asukal, di na ako naghahagilap

ayos na ang kape, di man matamis pag nalasap

kaysa bibili ng asukal, panggastos pa'y hanap

masarap din ang walang asukal, lalo't barako

na inumin ng tulad kong barakong may prinsipyo

para sa masa't mga kapatid nating obrero

masarap, malasa, magigising ang katawan mo

halina't uminom ng kapeng barako, kasama

habang nagninilay at kumakatha rin tuwina

ng alay na tula sa manggagawa't magsasaka

habang sinusulat din ang ginawa sa umaga

tumitigas ang itlog sa tubig na pinainit

lumalambot naman ang pinakuluang kamatis

sa barako'y nangingitim ang tubig kahit saglit

tandang sa diyalektika'y may iba't ibang bihis

- gregbituinjr.