Sa Bartolina ng Tugma't Sukat

SA BARTOLINA NG TUGMA'T SUKAT
ni Gregorio V. Bituin Jr.
10 pantig bawat taludtod

ako'y nakakulong ng matagal
sa bartolina ng tugma't sukat
pagkat ito ang payo sa aral
na simulan muna sa alamat
ng sinaunang pagtula natin
ang paglalaro nitong salita
upang sa simula'y pag-alabin
ang puso sa antigong pagtula
ngunit ang pagkawala ba rito
sa tugma't sukat ay kalayaan
o natatakot lang talaga tayo
sa tugma't sukat dahil di alam
kumawala man itong makata
sa bartolina ng tugma't sukat
tunay na malaya na ba siya
kung katha naman niya'y maalat?

Kung dukha na ang panulat

KUNG DUKHA NA ANG PANULAT
ni Gregorio V. Bituin Jr,
8 pantig bawat taludtod

kung dukha na ang panulat
paano pa magmumulat
ng mga pikit at dilat
na dito'y laging kulelat

kung dukha na ang panulat
at tinta'y wala ng katas
panulat na'y nagsasalat
sa diwang di lumalabas

ang diwa'y ating gisingin
ang pintig ng puso'y damhin
nasa ng utak ay dinggin
panulat ay pasiglahin

dukha lamang ang panulat
kung ayaw mo nang magmulat

Bahagyang Idlip

BAHAGYANG IDLIP
ni Gregorio V. Bituin Jr.
10 pantig bawat taludtod

kaunting tulog, bahagyang idlip
munting pahinga't paghalukipkip
tila ba siya'y nananaginip
gayong bukas niya'y di malirip
ano kayang kanyang iniisip

Sunog sa Santolan

SUNOG SA SANTOLAN
(Disyembre 6, 2009, Linggo ng gabi)
ni Gregorio V. Bituin Jr.
13 pantig bawat taludtod

"Sunog! May sunog!" mga tao'y nagulantang
pagkat biglang nagkasunog sa may looban
halos apatnapung bahay ang nasunugan
sa lungsod ng Pasig, sa Barangay Santolan

sinunog yaong may banta ng demolisyon
dahil ayaw daw tanggapin ang relokasyon
sa Calauan pagkat napakalayo noon
walang trabaho kaya tiyak gutom doon

tatlong naka-bonnet daw ang nanunog dito
ito ang usap-usapan ng mga tao
sinunog nila ang nasa tatlumpung metro
na may bantang demolisyon sa bayang ito

nagkasunog bandang alas-siyete ng gabi
maraming nagulat, tao'y di napakali
mga tao'y talagang nanggagalaiti
salarin ba'y sino ang makapagsasabi

mga nanunog ay dapat papanagutin
dahil ang ginawa nila'y talagang krimen
maagaw ang lupa ang kanilang hangarin
sila'y mga walang pusong dapat bitayin

o, taga-Santolan, magpakatatag kayo
dapat magkaisa diyan ang mga tao
halina't araw at gabi'y magbantay tayo
at ipagtanggol ang ating tahanan dito