Kung dukha na ang panulat

KUNG DUKHA NA ANG PANULAT
ni Gregorio V. Bituin Jr,
8 pantig bawat taludtod

kung dukha na ang panulat
paano pa magmumulat
ng mga pikit at dilat
na dito'y laging kulelat

kung dukha na ang panulat
at tinta'y wala ng katas
panulat na'y nagsasalat
sa diwang di lumalabas

ang diwa'y ating gisingin
ang pintig ng puso'y damhin
nasa ng utak ay dinggin
panulat ay pasiglahin

dukha lamang ang panulat
kung ayaw mo nang magmulat