Ang pamanang nailcutter

ANG PAMANANG NAILCUTTER

ang aking mga kuko'y kayhaba na pala

kaya nailcutter ay agad kong hinagilap

ang nailcutter pa ni misis yaong nakita

binili kong nailcutter ay di ko mahanap

habang nagtitipa sa kompyuter ng akda

ay naiirita sa mahahabang kuko

mabuti't kuko'y naputulan ko nang sadya

kaya maginhawa nang magsulat ng kwento

pamanang nailcutter ay may ngalang Liberty

pinaukitan ni Libay ng ngalan niya

at isa sa mga gamit niyang kayrami

na talaga kong iniingatang pamana 

nailcutter ni misis, may logo pang nalagay

Philippine Association of Social Workers,

Incorporated o PASWI, dito si Libay

ay kasaping kaytagal pagkat social worker

maraming salamat sa pamanang naiwan

naalala muli ang nawalang kapuso

kahit paano'y umalwan ang pakiramdam

sa kabila ng nararanasang siphayo

- gregoriovbituinjr.

08.14.2025

Hangin

HANGIN

tila may dumamping hangin sa pisngi

amihan, habagat, may unos muli?

ang kalagayan ko'y pinagbubuti

upang sa ginagawa'y manatili

pangarap ko pa rin ang makatapos

sapagkat kailangan ng diploma

magkakatrabaho ang may natapos

ay, kayhirap humanap ng kwarta

at mabuhay sa kabila ng hirap

mag-working student, may konting sahod

matupad ko pa kaya ang pangarap

upang magiging pamilya'y malugod

muli, sa pisngi'y dumampi ang hangin

tila sinabing magpatuloy ako

at mga pinapangarap ay kamtin

pagsusumikapang magkatotoo

- gregoriovbituinjr.

08.14.2025