Mapulang hasang

MAPULANG HASANG

namumula ang hasang, kapara'y sariwang isda

na sa anupamang sagupaan ay laging handa

tila bakal ang kaliskis nilang nakahihiwa

habang sugatang makata'y tila di makakatha

dapat magpalakas, muling papulahin ang hasang

bagamat di na pwedeng maging manggang manibalang

di man maging galunggong ay pating na kung sa gulang

may karamdaman man, bumabalik ang dating tapang

di dapat laging putla ang hasang, kundi'y mapula

may sakit man ay titindig ng matikas sa masa

kumbaga'y kaya pa ring tanganan ang manibela

na malalim man ang tubig ay kayang sisirin pa

dapat pula pa rin ang hasang ng tulad kong tibak

upang patuloy na ipagtanggol ang masa't hamak

upang mapalago pa ang tinanim sa pinitak

upang makata'y di naman gumagapang sa lusak

- gregoriovbituinjr.

11.13.2021

Tahimik man

TAHIMIK MAN

di ako nananahimik kahit mukhang tahimik

dahil ramdam ng puso't diwa ko ang mga hibik

ng mga pinagsamantalahan at pinipitik,

ng mga tinotokhang, ng binabaon sa putik,

pati nalulunod sa laot ng upos at plastik

malapit na ang Dakilang Araw ni Bonifacio

at Daigdigang Araw ng Karapatang Pantao

tahimik man ay di natatahimik ang pluma ko

buong puso't kaluluwa'y titindig pa rin ako

upang magpahayag at tumula sa entablado

para sa kalikasan at hustisyang panlipunan

nais kong maglakad muli sa landas na putikan

di ako matatahimik pag ako'y wala riyan

pakiramdam ko'y sinikil ang aking karapatan

na para bang nakamtan ko na'y luksang kamatayan

tahimik lang ako, subalit di nananahimik

tahimik man ako ngunit ayokong manahimik

sige, subukan lang nilang ako'y mapatahimik

subalit aking pluma'y tiyak na di tatahimik

tanging sa kamatayan lang ako mananahimik

- gregoriovbituinjr.

11.13.2021

Bitamina D

BITAMINA D

bakit ang manok ay nag-iisang nagpapainit

nakasalampak lang sa yerong tiyak nang mainit

nais magpalakas, sa sarili'y may malasakit

di man samahan ng mga manok na makukulit

nagsa-sunbathing kahit wala sa dalampasigan

natanaw ko lang siya't agad na nilitratuhan

anumang kwento niya'y wala akong kabatiran

bakit siya nagpapainit ay tulad ko rin lang

kapara ng Mulawin na sa araw nagmumula

ang lakas upang mga katawan nila'y sumigla

tulad ko ring nagpapaaraw sa umaga pa nga

upang Bitamina D ay makamtan nating sadya

wala man tayong ugatpak tulad nilang Mulawin

pagpapainit sa araw ay magandang mithiin

pagpapalakas ng katawan ang ating layunin

upang anumang sakit ay mapaglaban natin

magpaaraw at palakasin ang buto't kalamnan

upang Bitamina D ay taglayin ng katawan

ngunit di sa tanghaling tapat, kundi umaga lang

sapat na init lang upang sakit ay maiwasan

- gregoriovbituinjr.

11.13.2021

Aliwan

ALIWAN

aliwan ko na ang pagsagot sa palaisipan

na sa libreng oras ay sadyang kinagigiliwan

pinakapahinga ko na ang nasabing aliwan

sagot lang ng sagot at matututo ka rin naman

aba'y kayrami ko na palang nabiling ganito

natapos ko ang iba't minsan binabalikan ko

ang mga salitang sinasama sa tula't kwento

sadyang kapaki-pakinabang ang libangang ito

may nakakalito rin minsan sa mga katagâ

kaya susuriin mo ang pahalang at pababâ

pag natiyak ang tamang sagot, ilagay mong sadyâ

may salitâ ngang dito lang nabatid ng makatâ

tarang maglibang, sa palaisipan ay magsagot

sa una lang naman ang noo mo'y mapapakunot

ngunit masasagutan mo't di na pakamot-kamot

at kasiyahan ang tiyak sa iyo'y idudulot

- gregoriovbituinjr.

11.13.2021

Halamang gamot

HALAMANG GAMOT

may dalawang pampletong dapat ko palang basahin

hinggil sa halamang gamot na marapat alamin

sa sakit ko'y anong magandang katas na inumin

mula sa halamang gamot, ito'y dapat aralin

magbasa muna, sa dalawang pampleto'y tumuon

una'y nabili ko noon pang nakaraang taon

ikalawang pampleto'y nabili ko lang kahapon

napadaan sa bilihan at natsambahan iyon

nakita sa check up, mayroon akong diabetes

na sanhi kaya may pulmonary tuberculosis

ano bang halamang gamot upang ito'y maalis

o kaya tinamaang baga't bituka'y luminis

kumain ng kasoy, di ang buto, kundi ang bunga

ilaga ang dahon at bulaklak ng sitsirika

ilaga ang balat ng puno't dahon ng banaba

at pakuluan din ang dahon ng Damong Maria

sa dahon at ugat naman ng kogon ay gayon din

sa T.B., bulaklak ng lagundi'y ilaga mo rin

pinakuluang ito'y parang tsaa mong inumin

ito'y isang pag-asa upang tuluyang gumaling

kaya naisip kong magsimulang magtanim bukas

kahit sa pasô ng mga itong ating panlunas

di lamang upang magamot kundi upang lumakas

taospusong pasasalamat na ito'y nawatas

- gregoriovbituinjr.

11.13.2021

Paksâ

PAKSÂ

samutsaring paksa'y napulot ko sa panaginip

o kaya ay gising na ako habang nakapikit

gising ang diwa, nagninilay habang naiidlip

kaya kung anu-ano ang naritong nalilirip

pag nakakita ka ng bangin, huwag kang tatalon

pag nalanghap ay sariwang hangin, huwag lumulon

pag nakukuha ka sa tingin, huwag mong ituon

pag nakita'y bakbakan, saan ka naglilimayon

panaginip ang naiisip habang natutulog

ngunit agad magigising pag narinig ang kulog

parang totoo ang pelikula, buti't niyugyog

kasama bilang aktor sa Titanic na lumubog

sinabi sa panaginip ang samutsaring paksâ

ibinulong ng diwata ano bang itutulâ

kaya ngayong pagkagising ay tila namamanghâ

buti't di namamanglaw kundi ngayon ay masiglâ

- gregoriovbituinjr.

11.13.2021