Ako'y Katipunero ng makabagong panahon

ako'y Katipunero ng makabagong panahon
na sa mga problema ng baya'y makakaahon
kumikilos, nag-oorganisa ng dukha ngayon
mula sa bukangliwayway hanggang sa dapithapon
upang sila'y mamulat din upang magrebolusyon

isinasabuhay ang Kartilya ng Katipunan
upang maging mabuti sa kapwa tao't sa bayan
upang isapuso ang magandang kaugalian
binabasa't ninanamnan ang mga panuntunan
upang maging gabay sa bawat pakikipaglaban

dinidibdib ang dangal ng isang Katipunero
iisa ang pagkatao ng lahat, ang prinsipyo
sa Liwanag at Dilim na inakda ni Jacinto
may disiplinang bakal at kabutihang totoo
itinatayo ang isang lipunang makatao

mananatiling ako'y Katipunero sa diwa,
sa puso't dangal, kakampi ng dukha't manggagawa
laban sa mang-aapi, tiwali't tusong kuhila
aral ni Bonifacio'y niyakap at ginagawa
ako'y Katipunerong sa pakikibaka'y handa

- gregbituinjr.

Wala na silang nabibingwit na isda, wala na

wala na silang nabibingwit na isda, wala na
at di na isda ang nabibingwit nila, plastik na
bakit ganito, ang mga isda'y naging basura
inaasam na pagkain ay wala na, wala na

wala nang isda silang nabibingwit kundi plastik
tinatanggal nila sa lambat ay plastik at putik
sa mga basura ang lawa na'y namumutiktik
sinong maysala, kanino mangingisda'y hihibik?

tila baga ito sa mangingisda'y isang sumpa
plastik na ba ang kapalit ng gutom nila't luha
tila sa buhay nila'y may matinding nagbabadya
mapalad silang makabingwit kahit konting isda

ano nang dapat gawin sa ganitong kaganapan
aba'y dapat malutas ito ng pamahalaan
kung hindi naman ay magkaisa ang mamamayan
nang isda't di plastik ang mabingwit sa katubigan

- gregbituinjr.