HRD Protection Bill, Isabatas! Now na!

HRD PROTECTION BILL, ISABATAS! NOW NA!

Human Rights Defenders Protection Bill na'y isabatas

para sa karapatang pantao't sistemang patas

upang malabanan ang samutsaring pandarahas

ng sinumang Cain na di marunong pumarehas

talagang binasa ko ang H.R.D. Protection Bill

panukalang batas ito laban sa mapaniil,

mapang-abuso't sa karapatan ay naninikil

upang managot ang mga berdugong kumikitil

panukalang batas na ito'y aralin din ninyo

dagdag na armas para sa karapatang pantao

bakasakaling mapigilan ang mga berdugo

sa pagpaslang, maraming buhay na'y nasakripisyo

kaya H.R.D. Protection Bill, isabatas ngayon

dahil layunin nito'y magkaroon ng proteksyon

ang tagapagtanggol ng karapatang ang nilayon

ay mapabuti ang mundo't berdugo'y mapakulong

- gregoriovbituinjr.

04.14.2023

Sa ika-195 anibersaryo ng Webster Dictionary

SA IKA-195 ANIBERSARYO NG WEBSTER DICTIONARY

sa Webster Dictionary, taasnoong pagpupugay!

sa kanilang anibersaryo, mabuhay! MABUHAY!

tanda ko, bata pa'y mayroon nang Webster sa bahay

na sinasangguni nang nagsusunog pa ng kilay

diksyunaryong aming kasama't kasangga tuwina

upang grado'y mapataas habang nag-aaral pa

ito ang unang diksyunaryong sa bahay nakita

kaya tila siya'y kamag-anak naming talaga

salamat sa Webster at kami'y talagang natuto

upang maunawa ang maraming salita rito

limang taon na lamang at magdadalawang siglo

ang Webster, dalawandaang taong anibersaryo

magandang sanggunian, maliliit man ang titik

ngunit sa pagsangguni mo'y magiging matalisik

kahulugan ng salitang Ingles ay natititik

minsan, mga salita'y hahanaping nasasabik

bagamat Ingles ang wika'y natuto kaming sukat

upang poem, essay at short story ay masulat

sa pagsalin man ng wika, Webster ang binulatlat

muli, sa Webster Dictionary, maraming salamat!

- gregoriovbituinjr.

04.14.2023

Tanong

TANONG

ngayon po'y nais ko lang magtanong
sa mga talagang marurunong
pag-unlad ba'y paano isulong
kung kahulugan nito'y paurong

matatawag nga bang kaunlaran
kung sinisira ang kalikasan?
nagtayo ng tulay at lansangan
nagpatag naman ng kagubatan

bundok na'y kalbo sa pagmimina
mga puno'y pinagpuputol pa
negosyante'y tumaba ang bulsa
subalit hirap pa rin ang masa

sangkaterba ang ginawang plastik
na laksang tubo ang ipinanhik
ngunit plastik sa dagat sumiksik
sapa't ilog, sa plastik tumirik

anong klaseng pag-unlad ba ito?
progreso ba'y para lang kanino?
anong pag-unlad ba ang totoo?
kung nawawasak naman ang mundo?

sa pag-unlad, anong inyong tindig?
kung sira na ang ating daigdig
kanino kaya kayo papanig?
tanong ba'y unawa ninyo't dinig?

- gregoriovbituinjr.
04.14.2023

Pi

PI

numero iyong agad nakita

at PI ang sagot ko kapagdaka

na numerong pamilyar talaga

dahil mula sa matematika

PI ang rata ng sirkumperensya

ng bilog sa diyametro niya

ang PI ay kilala nang pormula

sa matematika at pisika

PI ay mula sa letrang Griyego

titik P ang kahulugan nito

ginamit dahil sa Perimetro

ng bilog, mabuti't nabatid ko

ang nagkalkula'y si Archimedes

isip ay magaling at makinis

si William Jones naman ang nagbihis

nitong PI sa makabagong tesis

nang sa krosword ito'y madalumat

ay PI ang agad kong isinulat

tangi kong masasabi'y salamat

dahil PI ay muling nabulatlat

- gregoriovbituinjr.

04.14.2023

Tangi kong handog

TANGI KONG HANDOG

patuloy kong mamahalin ang tanging irog

kahit pa ang aking araw na'y papalubog

patuloy kaming mangangarap ng kaytayog

at abutin ito habang kami'y malusog

pisngi ko man ay payat na't di na pumintog

at ang mangga'y manibalang pa't di pa hinog

siya'y rosas pa rin at ako ang bubuyog

na iwi kong pag-ibig ang tangi kong handog

- gregoriovbituinjr.

04.14.2023