Parang binigay na ang sagot

PARANG BINIGAY NA ANG SAGOT

sa Hanap-Salita, tingnan ang pagkaayos

nang ito'y sinagutan ko talagang lubos

para bang ibinigay na ang tamang sagot

tinamad ba ang lumikha't di na kumayod?

hahanapin mo ang nilatag na salita

ngunit sagot ay pulos pahalang na sadya

ni walang pahilis, ni wala ring pababa

para bang tinamad talaga ang lumikha

araw-araw ba naman nila itong gawin

para sa pahayagang pang-araw-araw din

talagang minsan kumatha na'y tatamarin

sa pag-aakalang di naman mapapansin

gayunpaman, salamat sa palaisipan

at ako naman dito't talagang nalibang

sana'y ipagbale-balentong nila naman

nang tumagal ang paghanap sa kasagutan

- gregoriovbituinjr.

05.11.2023

* ang Hanap-Salita ay nasa pahayagang Pang-Masa, Mayo 11, 2023, pahina 7

Alin ang mas mahal?

ALIN ANG MAS MAHAL?

alin ang mas mahal dito sa dalawa?

dami ba o bigat ang mas mahalaga?

itong kapeng 4-in-1 na 15 grams ba?

o ang kapeng 3-in-1 na 20 grams na?

mabigat na timbang o maraming laman?

binili ni misis, presyo'y di ko alam

20 grams ba na limang gramo ang lamang?

o ang 4-in-1 na mas lamang sa bilang?

ang 4-in-1, apat na klase ang meron

ngunit magaan kaya mas mura iyon

ang 3-in-1 ay tatlong klase man yaon

ay mas mabigat kaya mas mahal iyon

iyan ay teorya ko lang, di pa presyo

mabigat na timbang ang mas mahal dito

kung masasabi ni misis kung magkano

saka sabihing teorya ko'y totoo

buting ito'y batid upang sa susunod

ay alam na ang bibilhin pag sumahod

ang pag-usapan ito'y nakalulugod

lalo sa obrerong madalas ang kayod

- gregoriovbituinjr.

05.11.2023

Ang protesta ni Chess Int'l Master Sara Khadem

ANG PROTESTA NI CHESS INT'L MASTER SARA KHADEM

balita'y ipinaaaresto siya ng Iran

nang magpasya si Sara Khadem na mangibang bayan

lumipat ng Spain upang doon na manirahan

nito lamang Enero ng taong kasalukuyan

lumaban siya sa pandaigdigang kampyonato

nang walang suot na hijab o ng belo sa ulo

siya'y atletang Iranian at batas nila ito

kay Mahsa Amini ay pakikiisa rin nito

nang mamatay ang babaeng ngala'y Mahsa Amini

na diumano'y resulta ng police brutality

dahil di siya nagsuot ng hijab ay hinuli

dahil dito, protesta sa Iran ay tumitindi

para kay Sara Khadem ay defense of women's freedom

kaya paglayas sa Iran ay di niya dinamdam

sa pagkamatay ni Amini, siya'y nasusuklam

bilang chess master ay pinakitang may pakialam

mabuhay ka, Sara Khadem, at ikaw ay mapalad

nawa'y di ka madakip at basta lang makaladkad

chess master kang ang mali'y talagang inilalantad

kaligtasan mo at ng pamilya mo'y aming hangad

- gregoriovbituinjr.

05.11.2023

Ayon sa World Chess page na https://www.facebook.com/theworldchess:

Iranian IM Sara Khadem joins the lineup for the World Chess Armageddon Championship Series: Women's Week!

After being introduced to chess by one of her classmates at eight years old, Sara had her parents put her in a chess class. At the age of 12 she had her first successes by winning the Asian Under-12 Girls Championship and the World Under-12 Girls Championship. In 2018 Sara was the runner up in both Women's World Rapid and Blitz Championships, held in Saint Petersburg.

In 2022 at the World Rapid Championship in Almaty, Kazakhstan, Sara decided to compete without a veil, in defense of women's freedom and in solidarity with the protests that began after the death of the young Mahsa Zhina Amini in Iran. This decision completely changed her and her family's life, who are now living in the south of Spain.

Iba pang kaugnay na balita:

McClain, Dylan Loeb (30 December 2022). "After Competing Without a Hijab, a Top Iranian Chess Player Won't Return Home". The New York Times. Retrieved 2 January 2023.

"After playing without a hijab in a world championship, Iranian chess star defects to Spain". El Pais. 28 December 2022. Retrieved 4 January 2022.

"Iranian chess player 'moving to Spain' after competing without headscarf". The Guardian. 2022-12-29. Retrieved 2022-12-31.

Rodriguez, Elena (15 February 2023). "Iranian chess player in exile has no regrets about removing hijab". Reuters.

"Chess: On the day Sara Khadem met Spanish Prime Minister, an arrest warrant was issued against her in Iran". The Indian Express. 15 February 2023.

Kumakain ng walang pansinan

KUMAKAIN NG WALANG PANSINAN

walang pansinan ang limang kuting

habang naroroong kumakain

kaysaya rin nilang panoorin

matapos tirang isda'y hatiin

agad silang kanya-kanyang kuha

at saanmang sulok na'y pupunta

nang walang mang-agaw sa kanila

upang sa pagkain magkonsentra

iyan ang ugaling nakita ko

na ayaw nilang may manggugulo

subukan mo't matalas na kuko

pag inagaw ang pagkain nito

sila naman ay bata pa naman

at marami pang matututunan

pa'no mamuhay sa kalunsuran

paanong sa mesa mag-aabang

- gregoriovbituinjr.

05.11.2023

* ang bidyo ay mapapanood sa: https://fb.watch/ksoxt4dP-h/

Dalawang Pababa sa krosword

DALAWANG PABABA SA KROSWORD

minsan ay nakalilito ang dalawang Pababa

sa krosword pagkat titingnan ang tanong sa kabila

na para sa krosword sa itaas, matutulala

dahil Pahalang at Pababa ay di nagtutugma

kaya dapat alerto, dapat utak ay mabilis

bakit kaya ganoon, di magtugma, di magparis

huwag malito, nasa dyaryo lang ang tinutugis

para sa ibang krosword pala ang tanong na mintis

tanong sa One Pababa, gamit sa banyo, satin ba?

mali, sa isang One Pababa pa, klase ng tela

sa Two Pababa, ugali ba'y suksok sa baraha?

sa isang Two Pababa, ugali'y kostumbre pala

isa itong karanasan sa pagiging alerto

na magsuri ka pa rin, mata'y igalaw-galaw mo

tulad ng mga marites, madalas mag-usyoso

na iba pala ang tanong sa sinasagutan mo

tara, mag-ehersisyo ng isip sa pahayagan

at ating sagutan ang naroong palaisipan

kung may katagang di alam o ibang kahulugan

ay talagang mababatid mo rin sa kalaunan

- gregoriovbituinjr.

05.11.2023

* litrato mula sa pahayagang Bulgar, Mayo 7, 2023, p.11

Wala raw mag-like

WALA RAW MAG-LIKE

"bakit walang nagla-like sa facebook entry mo?"

tanong ni misis, aba'y napuna pa ito

di ko nga pinapansin ang mga ganito

sa tanong ni misis, anong masasabi ko?

marahil ay di naman kasi ako sikat

at pawang tula lang ang naisisiwalat

kaibigan ay di marami o di sapat

o tula ko'y di nila magustuhang sukat

maraming facebook like ay di ko naman layon

kundi mga katha ko'y ilagak lang doon

siya'y nila-like ng mga amiga roon

taka siya bakit sa akin ay di gayon

puna rin iyan noon ng isang kasama

nang sa isang burol, kami nama'y magkita

"bakit walang mag-like sa tula mo, kasama?"

tila kolektibo ko'y walang paki, anya

may nagla-like naman, kahit paminsan-minsan

ang agad kong depensa sa kanyang tinuran

lalo na't tingin nila'y mayroong katwiran

o ang paksa sa kanila'y may kaugnayan

marahil sa facebook like ay makikita na

kung ang tao'y palakaibigan talaga

tulad ni misis, maraming facebook like siya

dahil palakaibigan at sweet tuwina

o baka sadyang wala akong kaibigan

na lagi kong kaagapay sa kahirapan

at saya, kundi pawang kasamang palaban

kung sa post ko ay may mag-like, salamat naman

magparami ng facebook like ay di ko hangad

wala mang mag-like, kakatha ako't susulat

ng nasa loob at nakikita sa labas

ng samutsaring paksang makapagmumulat

- gregoriovbituinjr.

05.11.2023

* litrato mula sa google

Pangarap

PANGARAP

ano nga bang aking ipagmamalaki

kundi ang pangarap na makapagsilbi

sa uri't bayan subalit di masabi

bakit sa lathalang letra nabighani

publishing house ang pangarap kong itayo

pagkat makatang sa aklat narahuyo

maging pahayagan ay pinipintuho

ilalathala'y lumbay, katwiran, puso

gagawa ng maraming aklat ng tula

mithing unang nobela'y mailathala

patuloy na tutulong sa kawanggawa

kahit organisador pa rin ng dukha

magsusulat hinggil sa kapaligiran

paksa pa ri'y nasisirang kalikasan

habang tinataguyod ang bayanihan,

pati pakikipagkapwa't tangkilikan

pagkakaisahin ang magkakauri

bulok na sistema'y di mananatili

sakaling sa larangang ito'y masawi

nagawa'y buti sa buhay na pinili

- gregoriovbituinjr.

05.11.2023