Wala sa impyerno ang demonyo, ayon kay Shakespeare

WALA SA IMPYERNO ANG DEMONYO, AYON KAY SHAKESPEARE

"Hell is empty and all the devils are here." - William Shakespeare , The Tempest

wala naman daw demonyo sa impyerno

ani Shakespeare, na isang makatang henyo

nasa mundo na raw lahat ng diyablo

tulad ng mga kurakot sa gobyerno

nakaluluha nga ang katotohanang

sinabi ng makatâ, kaya ang bayan

ay galit na galit sa nangyaring iyan

tuligsa'y mga sangkot na lingkod bayan

anong dami ng kontraktor na demonyo

na nagkalat din sa Kongreso't Senado

akala mo'y flood control ay nagmumulto

iyon pala'y ghost pagkat walang proyekto

O, Shakespeare, anong sakit mong magsalitâ

ng katotohanan, tunay kang dakilâ

habang itong bansa'y nagdurusang lubhâ

dahil dinemonyo ng trapong kuhilà

- gregoriovbituinjr.

11.28.2025

* larawan mula sa google

Pag Biyernes, ikalima ng hapon sa Edsa Shrine

PAG BIYERNES, IKALIMA NG HAPON SA EDSA SHRINE

ilang Biyernes ng gabi na bang ako'y tumulâ 

sa Edsa Shrine na ang kasama'y ilang kabataan 

alas-singko ng hapon ay hinahabol kong sadyâ 

maikling programa, bago alas-sais tapos na

isa itong commitment para sa literatura

katapatan sa panitik nitong abang makatâ

katapatan sa pakikibaka laban sa mga

kurakot, buwaya, buwitre, at tusong kuhilà

binigyan ako ng pambihirang pagkakataon

ng kasaysayan upang tumulâ para sa nasyon

basta makatulâ lang, kahit butas ng karayom

ay papasukin, titiyaking makatulâ roon

ganyan lang kapayak ang buhay ng abang makatâ

anumang larangan, isyu't paksâ, handang tumulâ

bawat Biyernes ng hapon, tiyak manunuligsa

ng mga kurakot, araw-gabi mang naglulupâ

- gregoriovbituinjr.

11.28.2025

Pagdalaw sa puntod ni Ka Pabs

PAGDALAW SA PUNTOD NI KA PABS

naimbitahan akong sumama't dumalaw
sa sementeryo, pagyayang di tinanggihan
tula'y agad nilikha sa kainitan ng araw
dinalaw si Ka Pabs, magiting at palaban

isa siyang kasama, kapwa ex-detainee
dinalaw namin ang kanyang puntod sa Tanay
biglaan, namatay sa Home for the Elderly
wala raw kumuhang kamag-anak sa bangkay

batikang aktibista, isang mandirigmâ
nakibaka sa panahon ng diktadura
siya pala'y may kanser na tila lumalâ
wala rin daw kamag-anak siyang kasama

ilang beses din kaming nagkita sa pulong
ng Ex-Political Detainees Initiative
na samahan ng mga dati nang nakulong
dahil nakibaka't ang prinsipyo'y dinibdib

nag-asikaso't tumulong sa kanya'y Balay
na minsan na ring kumupkop sa tulad namin
sa'yo, Ka Pabs, taaskamaong pagpupugay
kaisa ka sa marangal na adhikain

- gregoriovbituinjr.
11.28.2025

* Balay - tumutukoy sa Balay Rehabilitation Center
* binasa sa munting programang isinagawa roon ang ikalawa hanggang ikalimang saknong ng tulang ito

Sa mga bagong pangalan sa Bantayog

SA MGA BAGONG PANGALAN SA BANTAYOG

taaskamaong pagpupugay sa lahat

ng mga bagong pangalang iuukit

doon sa Bantayog ng mga Bayani

sa Nobyembre ng taon kasalukuyan

Nolito H. Acebedo

Nonito A. Aguirre Sr.

Alex Boncayao

Jorge L. Cabardo

Ma. Leticia T. Celestino

Susan Fernandez

Yolanda H. Gordula

Bartolome S. Pasion

Francisco Portem

Roger C. Salas

Carlito R. Semilla

dalawa sa kanila'y naisulat ko

tula't talambuhay ni Alex Boncayao

higit isang dekada nang nakaraan

at ang librong sinalin ko sa Tagalog:

talambuhay ni Bartolome S. Pasion

pagpupugay sa mga bagong bayani

nakibaka sa maling pamamahala

lumaban sa mabangis na diktadura

lumaban upang baguhin ang sistema

ang pagkaukit ng kanilang pangalan

ay palatandaan ng kabayanihan

at ganap na pagkilala nitong bayan

sa nangarap ng makataong lipunan

O, sa inyo, na aming bagong bayani

ang inyong laban ay tinutuloy namin

hanggang makataong lipunan ay kamtin

pagsasamantala'y tuluyang pawiin

tungo sa makataong kinabukasan

walang pang-aapi sa sangkatauhan

mabuhay kayo, mga bayaning hirang

sa inyo'y taospusong pasasalamat

- gregoriovbituinjr.

11.28.2025