PAWIIN ANG PRIBADONG PAG-AARI
ni Gregorio V. Bituin Jr.
10 pantig bawat taludtod
pribadong pag-aari ang ugat
ng dusa ng masang nagsasalat
pribadong pag-aaring bumundat
sa kapitalistang laging angat
kaytindi ng pagsasamantala
dahil inaari ang pabrika
lupain, materyales, makina
nitong mayayamang elitista
ang kapitalista'y umasenso
habang ang masang nagtatrabaho
hirap pa rin, kaybaba ng sweldo
dukha pa rin ang mga obrero
hangga't may pribadong pag-aari
kahirapan ay mananatili
hangga't may pribadong pag-aari
lipuna'y mahahati sa uri
uring manggagawa, magkaisa
baguhin ang bulok na sistema
lalo't sistemang kapitalista
at ibalik ang dangal ng masa
durugin: burgesya, hari't pari
pati na pribadong pag-aari
pawiin natin ang mga uri
nang magkapantay lahat ng lipi
