BISIG, PAWIS, SAHOD, MANGGAGAWA
ni Gregorio V. Bituin Jr.
10 pantig bawat taludtod
kailangan ng lakas ng bisig
upang sa pabrika'y makakahig
pagkat ang pamilya'y kanyang ibig
na mapakain, di ang mabikig
kaya nagpapatulo ng pawis
nagsisipag siyang labis-labis
sa trabaho siya'y nagtitiis
kahit sa kapitalista'y inis
ayaw niyang laging nakatanghod
sa kawalan gayong may gulugod
sa pabrika siya'y naglilingkod
kapalit ng karampot na sahod
ang tulad niya'y kahanga-hanga
hiling lang niya'y bayarang tama
ang inalay na lakas-paggawa
ng lahat ng kapwa manggagawa
