Happy 81st Birthday po, Itay

MALIGAYANG IKA-81 KAARAWAN PO, ITAY!

salamat po sa lahat-lahat, kami'y nagpupugay

sa inyong pangwalumpu't isang kaarawan, Itay

nawa'y lagi ka pong nasa mabuting kalagayan

bagamat matanda na'y maganda ang kalusugan

Itay, masasabi ko pa ring "I wish you all the best"

dahil para po sa amin, ikaw pa rin ang DaBest!

- mula kina Greg Jr. at Liberty

11.17.2022

Talang Batugan

TALANG BATUGAN

sa Ursa Minor, ito ang pinakamaliwanag

na tala, Talang Batugan ang katutubong tawag

 

ito'y NorthStar o Hilagang Bituin pag naarok

na nasa dulo ng tatangnan ng Munting Panalok

nasa hilagang axis din ng mundo nakaturo

na pag umaga'y di makita't tila ba naglaho

tinatawag rin ang bituing ito na Polaris

na ngalan ay katugma ng bayaning si Palaris

Talang Batugan? aba'y may tamad nga bang bituin?

o dahil parang tuod ito kung di kikibuin

animo'y nakasabit lang na parang tinirintas

sa kalangitang tanging pag gabi lang lumalabas

oh, Talang Batugan, kung ika'y isang paraluman

magsisipag ako upang makasama ka lamang

- gregoriovbituinjr.

11.17.2022

* Talang Batugan - katutubong tawag sa Hilagang Bituin, ayon sa UP Diksiyonaryong Filipino, p. 1212

* Munting Panalok - Little Dipper

* Palaris (Enero 8, 1733 – Pebrero 26, 1765), bayaning lider mulang Pangasinan

* Ang tulang ito'y bahagi ng planong aklat na "Talastas Ko ang mga Bituin" na katipunan ng mga sanaysay, kwento at tula. Apelyido ng asawa ko'y Talastas at ako naman ay Bituin.

Sa aking lungga

SA AKING LUNGGA

ah, bihira na akong lumabas sa aking lungga

maliban kung may pagkilos ang kapwa maralita

nagbabasa roon sa munting aklatan ng akda

ng mga awtor, nobelista, kwentista't makata

namamalagi lamang sa ilang metro kwadrado

tila isang dipang langit o munting paraiso

kung saan palibot ay magasin at ilang libro

ang musika'y busina, huni ng ibon o radyo

habang ako'y nasa bartolina ng tugma't sukat

na pawang saknong at taludtod ang isinusulat

nagdidildil man ng asin pag araw na'y sumikat

sa pagbabasa't pag-inom ng tubig nabubundat

animo'y nasa kubong naroon sa kagubatan

na buhay sa kalikasan yaong nararamdaman

paglinang ng sining ko'y dito pinagbubuhusan

ng pawis, panahon, buong puso't guniguni man

- gregoriovbituinjr.

11.17.2022

Bilin sa poste

BILIN SA POSTE

sa poste: "Bawal Umihi Dito"

sa maraming poste pa'y ganito

ngunit kaiba ang biling ito

pagkat may dugtong: "Hindi Ka Aso"

tama nga naman ang panawagan

na aso'y huwag nating tularan

para sa tao'y may palikuran

kung wala, ihi muna'y pigilan

bakit poste ang iihian pa

dahil pagpigil ba'y di na kaya

subalit isipin din ang kapwa

kung dahil sa iyo'y mangamoy na

ang poste'y papalot o papanghi

batid mong yao'y nakadidiri

nais lang ng bilin na mapawi

ang sa tao'y pangit na ugali

pag-ihi'y kayanin at kontrolin

ang palikuran muna'y hanapin

pag nakita, ginhawa'y kakamtin

kung panunubig mo'y doon gawin

- gregoriovbituinjr.

11.17.2022