Ulam na kamatis at sibuyas

ULAM NA KAMATIS AT SIBUYAS

kamatis at alahas, ay mali, sibuyas pala

ang aking pananghalian, at kaysarap talaga

lalo na't magkarne ay sadyang iniwasan ko na

lalo't manok na kadiri na sa aking panlasa

kamatis, bawang, sibuyas, ang naging pampalakas

talbos ng kamote, sayote, sili, at sibuyas

isinasabuhay na rin ang pagkain ng prutas

mga bungangkahoy na kaysarap na panghimagas

sa ngayon, iwasan ang anumang uri ng karne

sa pangangatawan ko'y tila ba naging mensahe

magkalaman ang kalamnan ang adhika't diskarte

upang tumatag sa lakad, wala mang pamasahe

sa ganito ko niyakap ang simpleng pamumuhay

at puspusang pakikibakang may prinsipyong taglay

- gregoriovbituinjr.

02.02.2023

Taliba

TALIBA

ako'y propagandista nitong maralita

pinagsusulatan ay ang dyaryong Taliba

ng Maralita, na publikasyon ng dukha

dalawang beses sambuwan nalalathala

doon nilalagay ang mga isyu't tindig

hinggil sa mga usaping dapat marinig

binibigyang-buhay ang mga walang tinig

panawagang bawat dukha'y magkapitbisig

di dapat balewalain ang mahihirap

pagkat sila'y kauri, dapat nililingap

bagamat ang buhay nila'y aandap-andap

kaginhawaa'y nais din nilang malasap

bilang propagandista'y aming adhikain

kapwa dukha'y maging kaisa sa mithiin

isang makataong lipunan ay likhain

makataong mundo'y maging tahanan natin

- gregoriovbituinjr.

02.02.2023

* ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML)

Kape muna

KAPE MUNA

tara, igan, kape muna tayo

nang kalamna'y sumiglang totoo

may kaunting tinapay pa rito

at may balita ako sa iyo

ang sikmura'y painitin muna

mula sa mahamog na umaga

mabuti nang may laman, handa ka

sa mga daratal na problema

tiyak tayo'y mapapasagupa

sa nakaamba pang mga digma

ang mahalaga'y gising ang diwa

at katawan, di natutulala

kapag tayo'y magsisipag-sipag

kayrami nating maaatupag

ipakita ring tayo'y matatag

at ang loob ay mapapanatag

- gregoriovbituinjr.

02.02.2023