Tatak sa kamiseta

TATAK SA KAMISETA

tila poster ang sa t-shirt tatak

na talaga kang mapapalatak

di man nahihili'y nagaganyak

na magsuot din ng gayong gayak

bibili ako ng t-shirt ngayon

at patatatakan na rin iyon

heat press daw ang tawag sa ganoon

magbigay lang ng disenyo roon

magplano muna bago bumili

nang may maganda namang diskarte

ang disenyo'y planuhing mabuti

nang dama'y saya, kawili-wili

sa bawat araw ay susuutin

sa paanyayang iboto natin

ang kandidatong talagang atin

Manggagawa Naman, panalunin!

- gregoriovbituinjr.

03.25.2022

Tíbuyô ni Goryò

TÍBUYÔ NI GORYÒ

hinuhulugan ko ang tíbuyô

ng tiglima't sampung pisong buô

mag-iipon akong walang hintô

hanggang tibuyong ito'y mapunô

may baryang bente pesos ding sukat

mapunong tila kaing ng duhat

sa buong taon ay mapabigat

baka may ginhawang maiakyat

barya man ay pinag-iipunan

sa tíbuyô ng kinabukasan

upang sa panahong kagipitan

kahit paano'y may ipon naman

ganyan ang tíbuyô ng pangarap

na punong-puno ng pagsisikap

may mahangò sa panahong hirap

may dudukutin sa isang iglap

- gregoriovbituinjr.

03.25.2022

* tíbuyô - Tagalog-Batangas sa wikang Kastilang alkansya

Titisan

TITISAN

gumawa pang muli ng titisan

o ashtray upang mapagtapunan

ng upos at titis ng sinumang

nagyoyosing madalas o minsan

iaambag ang titisang iyon

sa mga opisina - ang misyon

upos at titis, ilagay doon

na sa kalikasan din ay tulong

salita'y itinataguyod din

na may salin na sariling atin

na maganda ring ating gamitin

di pulos ashtray na iinglesin

tulad ng tibuyo sa alkansya

banoy naman para sa agila

at sa iskor at tally ay para

sa ashtray ay may titisan pala

wikang sarili'y ipalaganap

ito'y itaguyod nating ganap

wikang pangmasa sa pag-uusap

unawain ito't ipalasap

ganito sa tulad kong makata

gamit sa kalikasan at diwa

itaguyod, sariling salita

wika ng bayan, wika ng madla

- gregoriovbituinjr.

03.25.2022

Pagsasalin ng haiku

PAGSASALIN NG HAIKU

Nakabili ako ng libro ng haiku ng makatang Hapones na si Matsuo Basho noong Abril 13, 2019 sa halagang P80.00. Nilathala ito ng Penguin Classics. Naitago ko ang librong ito at nakita muli. Binasa ko ang ilan niyang haiku na pawang salin na sa Ingles. 

Sinubukan kong isalin sa wikang Filipino ang lima niyang haiku sa paraan ding iyon na pantigang 5-7-5. Pinili ko lang ang isinalin dahil ang iba'y hindi kayang ipasok sa 5-7-5 dahil sa mahahabang salita natin. Na marahil sa wikang Hapones,  maraming salitang iisa ang pantig na pasok na pasok sa kanilang haiku.

p. 28

Whiter than stones (Ang Batong Bundok)

of Stone Mountain - (maputi pa sa bato -)

autumn wind. (hanging taglagas.)

p. 31

Where cuckoo (Nang ibong kuku)

vanishes - (ay tuluyang naglaho -)

an island. (ang isang pulo.)

p. 38

Violets - (Ang mga lila -)

how precious on (kayhalaga sa landas)

a mountain path. (ng kabundukan.)

p. 47

Come, see real (Halika, tingni)

flowers (ang bulaklak sa mundong)

of this painful world. (napakasakit.)

p. 49

Crow's (Ang iniwanang)

abandoned nest, (pugad ng isang uwak,)

a plum tree. (puno ng duhat.)

Isa siyang inspirasyon. Pawang mula sa kalikasan ang kanyang mga haiku. Dahil dito, kumatha rin ako ng una kong limang haiku.

1

Langay-langayan

pagkatuka'y lilipad,

parang tulisan!

2

Ang mga langgam

ay sadyang kaysisipag,

mumo na'y tangay!

3

Daga sa bahay,

takbuhan ng takbuhan,

kisame'y luray.

4

Sa tinding usok,

napuksa ba ng katol

ang laksang lamok?

5

Pusa'y humibik,

nang mabigyan ng tinik

agad humilik.

- gregoriovbituinjr.

03.25.2022

Almusal ko'y tula

ALMUSAL KO'Y TULA

madalas, almusal ko'y tula

imbes kanin at pritong isda

madaling araw na'y kakatha

pagbukangliwayway, may tula

tula muna'y aalmusalin

pag nabusog ay lulutuin

ang agahang talagang atin

ang isda, kanin at gulayin

kaya almusal pagkaluto

magsasalo ang magkasuyo

basta huwag lang matutuyo

ang tiyan, lalamuna't puso

almusal ko'y tula, madalas

madaling araw pa'y pupungas

pangarap na lipunang patas

yaong sa diwa'y pinipitas

at isusulat nang malambing

tila tulog, sarap ng himbing

subalit tula'y nanggigising

kaya sa pagtula'y nagising

- gregoriovbituinjr.

03.25.2022