ANG SUMPIT NG PASLIT
ni Gregorio V. Bituin Jr.
9 pantig bawat taludtod
patuloy ang laro ng paslit
habang tangan niya ang sumpit
bala'y balatong na malagkit
na kapag dumapo'y kaylupit
naglalaro habang mainit
sa labasan ang makukulit
habang ina'y tila ba galit
sa anak na nangungunyapit
itigil na ang larong sumpit
kung ito'y nakakapanakit
maglaro lang ng pangmabait
nang masaya ang mga paslit
aba'y huwag ka nang humirit
makuha ka sa isang sitsit
