PAGKASAID
nasasaid din ba ang haraya
kaya minsan ay di makatula?
may panahon ding nakatulala
sa kawalan, walang bungang diwa?
madalas tumitig sa kisame
butiki'y nakitang nagbabate
nang biglang dumapo'y kalapati
naroong kasama'y kulasisi
ano na ngayon ang iisipin
kung ang utak ay di pipigain
haraya'y wala sa toreng garing
wala rin sa pusaling maitim
baka dapat magpahinga muna
pagkat diwa't katawa'y pagod na
baka naman bukas ng umaga
haraya'y bumalik, nagdurusa
- gregoriovbituinjr.
07.17.2023
