May ligalig man sa bisig

maingat ang mga pintig
may ligalig man sa bisig
lalaban, di palulupig
nang hinaing ay madinig

nagsidalaw sa palasyo
ang laksa-laksang obrero
kuyom ang mga kamao
may parating bang delubyo?

Rehimeng sa kapitalista'y kaylambot

matigas ang kamaong may apoy ng poot
namumuo ang himagsik laban sa salot
na kontraktwalisasyong di kayang masagot
ng rehimeng sa kapitalista'y kaylambot

Kontraktwalisasyon ay sugat na kaylalim

tiim-bagang laban sa paglukob ng dilim
umaalimpuyo ang galit sa rehimen
kontraktwalisasyon ay sugat na kaylalim
nangakong magtanggal nito pala'y balimbing