Martes, Oktubre 12, 2010

Istambay sa Kanto

ISTAMBAY SA KANTO
ni Gregorio V. Bituin Jr.
11 pantig bawat taludtod

noon, istambay lang ako sa kanto
alak at yosi ang kabarkada ko
nag-istambay dahil walang trabaho
laging nagbibilang ng poste rito
tanghaling gumising ang pobreng ito

ngayon, mukhang istambay pa rin ako
minsan, patunga-tunganga sa kanto
ang laging hanap ay maikukwento
at kinakatha ay kung anu-ano
para mailagay sa aming dyaryo

itong tambay na nga ba'y umasenso
mula sa kanto'y napunta ng dyaryo
noon, poste ang binibilang nito
ngayon, binibilang ay artikulo
katha'y pwede na bang maisalibro

masarap pa ring tumambay sa kanto
di na nagbibilang ng poste rito
kundi naghahabi ng tula't kwento
basta sa kanto'y wala lang peligro
payapa ang buhay at walang gulo