Kapanatagan

KAPANATAGAN

kapanatagan sa puso't diwa'y ramdam mong sukat

di sa pananahimik kundi sa pagiging mulat

panlipunang hustisya'y nakamit na ng kabalat

karapatang pantao'y pinaglalaban ng lahat

kaya naririto akong nagpapatuloy pa rin

sa niyakap na prinsipyo, mithiin, adhikain

pagtatayo ng lipunang makatao'y layunin

at sa puso't diwa ang kapanatagan ay kamtin

di ako tumatambay sa probinsya't nakatanghod

wala roon ang laban kundi narito sa lungsod

ayokong sayangin ang panahon kong nanonood

kung may isyung dapat ipaglaban ako'y susugod

di rin tatambay sa bakasyunan sa lalawigan

kung wala namang mga sakit na nararamdaman

di rin naman nagreretiro sa anumang laban

dapat lang ituloy ang nasimulan, mamatay man

bagkus sa pakikibaka'y walang pagreretiro

hangga't di maitayo ang lipunang makatao

wala pa ngayon ang kapanatagang pangarap ko

hangga't di maitayo ang lipunang makatao

- gregoriovbituinjr.

08.18.2021

Gawain ng panitikero sa kasaysayan

GAWAIN NG PANITIKERO SA KASAYSAYAN

pulos mga kathang isip lang ba ang binabasa

ng ating panitikero, makata't nobelista

di ba't bilang manunulat, alam din ang historya

ng bayan, magsulat man ng tula, nobela't drama

kasaysayan ng bansa't ng mundo'y dapat mabatid

sa bawat panitikerong di dapat nalilingid

paanong pang-aalipin ay tuluyang napatid

paanong mga bansa'y lumaya sa tuso't ganid

paano nasuri ang nakitang sistemang bulok

bakit sa diktadura, mga bayan ay nalugmok

bakit nahalal ang pinunong palamura't ugok

ang Boxer's Rebellion ba sa Tsina'y panay ba suntok

panitikero'y may gawain din sa kasaysayan

dapat inaral din ang Kartilya ng Katipunan

ang Liwanag at Dilim ni Jacinto'y natunghayan

pati kwento ng mga hari't sistemang gahaman

nakitang mali sa kasaysayan ay tinatama

sa paraang batid nila, nobela man o tula

kasaysaya'y sinapelikula o sinadula

o sa mga sanaysay man na kanilang inakda

kaya ako bilang makata at panitikero

pagbabasa ng historya'y ginagawang totoo

nakatagong lihim ay maipabatid sa tao

itula ang kasaysayan sa paraang alam ko

- gregoriovbituinjr.

08.18.2021

ATM - Automatic To Misis

ATM - Automatic To Misis

may A.T.M. na rin ako, Automatic To Misis

ibigay kay misis ang kinita ng walang mintis

ang mga kaperahang walang kulang, walang labis

daraan lang sa palad, mawawalang anong bilis

kaya pasasalamat sa pinasok na kampanya

ng aming samahang may kakulangan sa pinansya

ngayon dapat kumilos sa tinanggap na programa

at paghusaying epektibo ang kampanyang masa 

ganyan naman ang buhay-mag-asawa, may bigayan

lalo't marapat lang na si misis ang ingat-yaman

dahil kung ako lang, sa libro'y ubos agad iyan

na nasa isip lagi'y saliksik sa panitikan

pag may pera'y di ginagastos sa anumang bisyo

anong bait naman, aba'y di naninigarilyo

bihira ring mag-inom, pulos bili lang ng libro

tanging bisyo'y kumatha lang ng tula isa singko

kaya A.T.M. ko'y parang tibuyô o alkansya

doon ilagak ang anumang matanggap na kwarta

na ibig sabihin, kay misis agad iintrega

kaysa pera sa kamay ko'y parang bula't wala na

- gregoriovbituinjr.

08.18.2021

Tulang salin: Ang landas na di tinahak

ANG LANDAS NA DI TINAHAK

Klasikong tula ni Robert Frost, makatang Amerikano

Malayang salin ni Gregorio V. Bituin Jr.

16 pantig bawat taludtod

Dalawang lansangan ang lumihis sa dilaw na kahoy,

At paumanhin kung  di ko ito kapwa matatahak 

At maging isang manlalakbay, kaytagal kong tumayo

At tumingin nang pababa hanggang sa makakaya ko

Kung saan ito yumuko sa mga halamang ligaw

Ipinasya kong tahakin ang daang tingin ko’y patas,

At dahil na rin marahil sa mas mahusay na pasya,

Lalo na't madamo roon at kaysarap na suutin

Bagamat tinitingnang ang pagtahak sa dakong iyon

Ay nakakapagod din bagamat sila’y pareho lang

At kapwa sa umagang iyon, pantay na nakalatag

Yaong mga dahong walang hakbang na naiitiman.

Ay, akin muna itong ilalaan sa ibang araw!

Batid man kung paanong daan ay gigiya sa landas

Ay nagdududa ako kung ako’y makababalik pa.

Masasabi ko lamang ito nang may buntong hininga

Saanman maging noong una hanggang panahon ngayon

Dalawang lansangan ang lumihis sa kahoy, at ako’y—

Tinahak ko ang landasing di gaanong nalalakbay

At ito lang ay nagpakita na ng pagkakaiba.

- Salin ng tulang The Road Not Taken, na nakasulat sa Ingles, na nasaliksik ng tagasalin sa aklat na The Mentor Book of Major American Poets, pahina 250. Ang nasabing aklat ay nabili ng makatang gala sa Book Sale sa Farmers Plaza, sa Cubao, QC, sa halagang P125.00 noong Nobyembre 20, 2020.

- Natapos isalin ngayong 08.18.2021

Sa bawat butil

SA BAWAT BUTIL

ang butil ay di dapat maaksaya't maging mumo

na baka sa bawat hapag-kainan ay magtampo

bahala na ba ang mga langgam sa mumong ito

na sa kanila'y alay mo na sa labas ng plato

mula palay tungong bigas hanggang sa maging kanin

ang nilalandas ng munting butil na kinakain

gintong butil na inaalagaan nang magaling

kung iluto'y in-inin nang maganda ang sinaing

mula sa butil ng pawis ng mga magsasaka

na madaling araw pa lamang ay nasa bukid na

kaya makikita mo kung gaano kahalaga

ang bawat butil na bumubuhay nga sa pamilya

kahit bahaw ay kainin, sa umaga'y isangag

huwag hayaang mapanis sakaling maglagalag

kasangga ang butil upang prinsipyo'y di matinag

at buhay ng ating buhay upang maging matatag

- gregoriovbituinjr.

08.18.2021

Ang papepi

ANG PAPEPI

wala nang toyo kaya nagtungong tindahan

nang madapa kaya ngayong nag-aalangan

pumuntang banyo't sugat muna'y hinugasan

paika-ika't sinisisi'y katangahan

pinanonood kasi'y langgam na nagbuno

gayong tuliro sa gutom na di maglaho

ah, dapat nang labhan ang medyas na mabaho

saka na atupagin ang dinidibuho

tingin na sa sarili'y papepi o lampa

na kamay ay laging nasa loob ng bulsa

katawang payat, mahina't namumutla pa

di kasi kumakain sa oras tuwina

kanyang hinimas-himas ang duguang tuhod

kung di agad tumayo'y baka napilantod

aral sa kanya: huwag laging nakatanghod

o lumilipad ang isip na parang tuod

- gregoriovbituinjr.

08.18.2021