BUDHING SING-ITIM NG PUWIT NG KAWALI
ni Gregorio V. Bituin Jr.
10 pantig bawat taludtod
pag prinsipyo'y nagkabali-bali
pulitiko'y nagiging tiwali
nasisilaw sila sa salapi
binebenta ang sa bayang puri
sa nasakuna'y di magbahagi
sa elitista'y nananaghili
sa bayan nagtetengang-kawali
sa batas malimit magkamali
buong bayan na ang nasasawi
ang batas binubutas mag-uli
kaypangit ng ganitong ugali
asal-hayop na nakadidiri
kahit pa magpabango'y kaypanghi
tila ba nahulog sa pusali
ang ganito'y nakakaunsyami
dapat baguhin ang ganitong gawi
tulad nila'y kay-itim ng budhi
sing-itim ng puwit ng kawali
