Digong versus Makoy

DIGONG VERSUS MAKOY

‎

‎kapwa sila mga / strongman, pangulo

‎nais nilang bansâ / ay disiplinado

‎ngunit ang nangyari / ay dispalinghado

‎buhay ay tinangay, / desaparesido

‎

‎pinakamahinang / nilalang ang target

‎ng tokhang, pinaslang / ay pulos na adik,

‎walang pera, walang / ngalan, nilalait,

‎takot magreklamo, / madaling malupig

‎

‎ang tinarget naman / niyong diktadura

‎ay matatalinong / tao, aktibista

‎kabilang ang ngalang / Liza, Liliosa,

‎Edjop, Hermon Lagman, / Eman Lacaba pa

‎

‎kung ikukumpara, Digong versus Macoy‎

pinagnilayan ko / ang bawat panaghoy

‎ng mga nawala't / mga dahong luoy

nagmarka sa bayan / ang init ng apoy

‎

‎- gregoriovbituinjr.

‎09.26.2026‎

* litrato mula sa google

Trapo at basahan

TRAPO AT BASAHAN

bentador ng bayan ang trapo

ang turing sa dukha'y basahan

trapo'y nanloloko ng tao

ayuda ang nasa isipan

ano bang aasahan natin

sa dinastiyang pulitikal

kundi tayo'y muling utuin

upang kumita ang kapital

sa trapo ang sistemang bulok

habang asam nati'y hustisya

tingin nila, sila ang rurok

mapagsamantalang burgesya

sila'y ibon sa himpapawid

habang tayo'y isda sa dagat

di sila kauri'y batid

sa ganyan ay dapat mamulat

ibagsak na ang mga trapo

na turing sa masa'y basahan

dapat nang nagpapakatao

ang bawat isa sa lipunan

- gregoriovbituinjr.

09.26.2026

* litratong kuha ng makatang gala