Ang puting buwan

ANG PUTING BUWAN

may isang awiting nagsasabing "dilaw na buwan"

habang ako nama'y nakatanaw sa puting buwan

"dilaw na buwan" niya'y ano kayang kahulugan?

tara, kanyang liriko'y atin munang pasadahan

"sa ilalim ng puting ilaw sa  dilaw na buwan

pakinggan mo ang aking sigaw sa dilaw na buwan"

anya pa, ayaw niyang tumanda sa kalungkutan

makasama lang ang sinta'y kanya nang kasiyahan

makahulugan ang "dilaw na buwan" sa umawit

habang kita ko'y puting buwan pagtanaw sa langit

dumidiga siya sa dilag, pag-ibig ang bitbit

at ang kariktan ng dilag sa buwan na'y naukit

ah, puting buwan mang aking nakikita sa taas

ay sagisag na handog sa kasi'y pagsintang wagas

ngunit di sapat ang alay kong tsokolate't rosas

kung wala naman akong pambili ng kabang bigas

- gregoriovbituinjr.

05.08.2023

Positibong palakasan, negatibong palakasan

POSITIBONG PALAKASAN, NEGATIBONG PALAKASAN

dalawang kahulugan, positibo, negatibo

depende paanong salita'y gagamitin mo

palakasan ang sports pag sa wikang Filipino

palakasan din pag may pagtiwali sa proseso

kaya magandang maghanap ng panibagong salin

sa sport na di na palakasan ang gagamitin

upang maiwasan natin ang kaibang pagtingin

lalo na't negatibong kaugalian sa atin

sa pahayagan ngayon ay kitang-kita talaga

ang magkabaligtad na kahulugan ng dalawa

anim na ginto sa PALAKASAN ang bumandera

habang sistemang PALAKASAN ay tutuldukan na

baka negatibong palakasan na'y manatili

kaya salin ng sports ang ibahin kung sakali

ito'y panawagan na't dapat tayong makapili

upang maipagbunyi ang sa sports magwawagi

- gregoriovbituinjr.

05.08.2023

* ang litrato ay mula sa una at huling pahina ng dyaryong Pilipino Star Ngayon, Mayo 8, 2023

Gutom na ang kuting

GUTOM NA ANG KUTING

kay-amo ng mukha ng isang kuting

na ngiyaw na ng ngiyaw pagkagising

nagutom sa kaytagal na paghimbing

sa magdamag, tila bunso sa lambing

mamaya'y pakakainin ko sila

ng kung anong sa isda ay natira

di lamang tinik, may laman talaga

lalo't ulo na gustong-gusto nila

pag gutom, di rin ako mapalagay

tulad ng kuting na ngiyaw ng ngiyaw

ako'y patuloy na nakasubaybay

sa kanila, sa gabi't araw-araw

napapansin ko'y aking sinusulat

talambuhay nila'y naiuulat

at binibidyuhan pa silang sukat

bilang patunay ng nadadalumat

- gregoriovbituinjr.

05.08.2023

* ang bidyo ay mapapanood sa kawing na: https://fb.watch/ko6vAeL76p/

Almusal ko'y sinaing na tulingan

ALMUSAL KO'Y SINAING NA TULINGAN

anong sarap niring aking agahan

sa palengke'y nakabili na naman

ng ulam na sinaing na tulingan

bigas na mais pa ang aking kanin

aba'y talagang nakabubusog din

at may kapeng barako pang inumin

tila baga ako'y nasa Batangas

gayong nasa Q.C. lang pag nawatas

ayos na kahit walang panghimagas

kaysarap pa ng sabaw nitong patis

ng isda, kalamyas pa'y di matiis

na pag pinapak mo'y ngingiting labis

tarang mag-almusal, saluhan ako

upang maibahagi ko sa iyo

itong sarap na nararamdaman ko

sinaing na tulingan nga'y kaysarap

tila hinehele sa alapaap

ng aking mga lunggati't pangarap

- gregoriovbituinjr.

05.08.2023

Hinawan

HINAWAN

salitang ugat ng "hinawan" ay dalawa

ginamitan ng gitlapi at hulapi pa

hawan ang aking napagtanto noong una

ngunit nang makita ko ang sagot, iba pala

hinawan, tulad ng hinawan ko ang landas

na sa panitikan ginagamit madalas

hinawan pala, kung saan ka naghuhugas

o naghihinaw ng kamay, aking nawatas

bata pa ako, maghinaw na'y aking batid

dahil si ama, iyan ang salitang gamit

bago kumain, maghinaw ang magkapatid

sa pagsakol sa kanin, kamay na'y malinis

paghawan ng landas ay gamit ko sa tula

na minsan nababasa sa kwento't pabula

kaya sa palaisipan ay natunganga

sa hinawan ay ano bang ibang salita

isa ring nakabibiglang aral sa akin

salitang ugat ay iba kung unawain

di hawan, kundi hinaw, pag iyong isipin

at hulaping -an ang panlaping gamit man din

lababo pala yaong sagot sa hinawan

doon naghihinaw ng kamay kadalasan

iba ang hawan na gamit sa kaparangan

paghahawan ng damo upang malinisan

- gregoriovbituinjr.

05.08.2023