MABUTING NARIRIYAN KA SA AKING TABI
ni Gregorio V. Bituin Jr.
13 pantig bawat taludtod
Mabuting naririyan ka sa aking tabi
Ikaw ang aalayan ko ng pagsisilbi
Kapag nakikita ka sa araw at gabi
Ang iwing puso'y kumakabog ng kaytindi
Espesyal ka sa buhay ko, natatangi ka
Lalo't kita'y kasama sa pakikibaka
Ang samahan nati'y pinagtiyap na sanga
Gigisingin ang bayan, lalo na ang masa
Ako't ikaw ay aktibistang tumitindig
Na prinsipyo'y uring manggagawa'y makabig
Dadalhin sa sosyalistang landas at panig
At babaguhin ang lipunan, kapitbisig.
