Alikabok at Agiw

 ALIKABOK AT AGIW
ni Gregorio V. Bituin Jr.
14 pantig bawat taludtod

sa bawat alikabok / na namuo sa sahig
at agiw sa kisameng / animo'y ikinalat
nariyan ang dyanitor, / may malakas na bisig
masipag na obrero / kahit na nagsasalat

hawak yaong panlinis, / lampaso bawat sulok
ang mga alikabok, / hinahagip ng tingting
mga nagbiting agiw / lalo't nasa tuktok
kinakayod ng maigi't / sinisikap tanggalin

manggagawang alagad / siya ng kalinisan
mula kisame't sahig, / silya nama't lamesa
nais niyang ang sahig / ay pwedeng salaminan
ngunit obrero siyang / kontraktwal lang ang gana

pag siya'y wala, tiyak / kayrumi at kaygulo
masipag na dyanitor / kalabaw kung kumayod
lampaso ng lampaso / sa maghapong trabaho
ngunit natatanggap lang / ay karampot na sahod

Makulimlim ang Umaga

MAKULIMLIM ANG UMAGA

ni Gregorio V. Bituin Jr.

13 pantig bawat taludtod

umaga'y makulimlim, may bantang pag-ulan

nawa'y di maging unos, kawawa ang bayan

yaong tikatik lang, sapat sa kabukiran

upang magsasaka'y ganap ang kasiyahan

huwag mabahala sa pagdatal ng bagyo

may bahagharing magpapakita sa tao 

na tanda ng pag-asang humayo pa tayo

at gawin ang marapat sa kapwa't sa mundo

ulan, ulan, pantay kawayan, sabi nila

bagyo, bagyo, pantay kabayo, ang dagdag pa

awiting bayan itong aking nakilala

nang bata pa't naniningala sa dalaga

may bantang pag-ulan, umaga'y makulimlim

sana kalangita'y di tuluyang magdilim

upang ang bubuyog bulaklak ay masimsim

nang lumigaya ito't huwag nang manimdim