TELEBISYON
marahil wala kasing telebisyon
kaya nagagawa ang nilalayon
sinusulat ang mga napapansin
at anumang napagninilayan din
minsan, nakatunganga sa kisame
paksa'y samutsari, di man balanse
at nakakapagkonsentra talaga
sa pagsulat ng asam na hustisya
buti't walang telebisyon sa bahay
at naisusulat ang tuwa't lumbay
para bang telebisyon na'y balakid
sa nadadalumat, sa nababatid
bagamat minsan, nais kong manood
ng Voltes V na ikinalulugod
upang mabalikan ang nakaraan
ang panahon ng aming kabataan
telebisyon ba'y pampalipas-oras
lalo't di makapili ng palabas
nagti-T.V. rin naman noong araw
nang lumalaban pa si Manny Pacquiao
- gregoriovbituinjr.
06.15.2023
