Pag-alala sa Cordillera Day

pinaslang si Macliing Dulag ng mga sundalo

dahil planong Chico Dam ay ipinrotesta nito

at mawawalan sila ng tahanan dahil dito

kanilang lupang ninuno'y masisirang totoo

petsang Abril bente kwatro nang siya ay pinaslang

ng mga kawal ng gobyerno, mga pusong halang

petsang ginawang Cordillera Day ng mamamayan

at ginugunita taun-taon ng sambayanan

dalawa ang Cordillera Day, isa'y Hulyo Kinse

kasunduang Cory Aquino't Padre Balweg dine

subalit ngayong Cordillera Day ay nagsisilbi

bilang paalala kay Macliing bilang bayani

pagpupugay sa Cordillera Day, kami ni misis

ay kapwa inaalala ito ng walang mintis

- gregoriovbituinjr.

04.24.2021

* Pinaghalawan:

https://newsinfo.inquirer.net/395097/what-went-before-cordillera-day

https://newsinfo.inquirer.net/1110387/indigenous-people-celebrate-cordillera-day-with-street-protest

May community pantry na rin si Gabby Garcia

MAY COMMUNITY PANTRY NA RIN SI GABBY GARCIA

talaga ngang inspirasyon ang community pantry

kaya nagsulputan ang mga ito't dumarami

nagtayo na rin ng community pantry si Gabbi

Garcia na nais tumulong, sa kapwa'y magsilbi

sinabi nga niya sa panayam sa telebisyon

nagsulputang community pantry ay inspirasyon

kaya nagtayo rin siya nito't nais tumulong

kaygandang adhika para sa masang nagugutom

lalo na ngayong may pandemya't kulang ang ayuda

nagbibigayan at nagdadamayan na ang masa

tunay na bayanihan ay kanilang pinakita

ang bayanihang ito sa mundo na'y nababasa

at sa iyo, Gabbi Garcia, maraming salamat

sa panahong may pandemya, tumulong ka ring sukat

sa kabutihan mo, sana'y marami pang mamulat

Oh, Gabbi Garcia, taospusong pasasalamat

- gregoriovbituinjr.

Pagpupugay sa mga naglilingkod sa pantry

sa nagtatayo ng kanilang community pantry

pagpupugay, mabuhay kayo't kayraming sumali

at nagboluntaryo upang sa kapwa nga'y magsilbi

nakipagbayanihan, nakipagkapwa, bayani

aba'y imbes na i-redtag ay nakisawsaw na rin

ang mga pulitikong karamihan ay balimbing

na nilagay pa ang pangalan nila sa tarpolin

pati kapulisang dapat nakatutok sa krimen

pag inaral mo ang kasaysayan ng himagsikan

o ang natayong mga mapagpalayang kilusan

sa ayaw mo man o gusto, marami'y katugunan

ng masa sa kainutilan ng pamahalaan

maraming halimbawa nito'y ating makikita

tao'y hindi pumipikit at laging umaasa

sa ayuda't limos, kundi nag-iinisyatiba

upang mapunan yaong kakulangan ng sistema

tugon sa kainutilan kundi man sa kabulukan

ng lideratong nagpauso ng mga patayan

kaya di maikakaila ang pagsusulputan

ng community pantry na tugon sa kagutuman

espontanyo't batid ng masa ang halaga nito

kaya pinili nilang maglingkod sa kapwa tao

inisyatibang ito'y di matanggap ng gobyerno

dahil nasapawan ang palpak nilang liderato

sa mga nagsimula nito, maraming salamat

tinugunan ang kapalpakan, at kami'y namulat

na magbayanihan pala'y magagawa ng lahat

ng walang panibugho kundi maglingkod ng tapat

- gregoriovbituinjr.

Kung mga community pantry ay nire-redtag na

kung mga community pantry ay nire-redtag na

komunista daw, mabuti pala ang komunista

bayanihan at damayan yaong prinsipyo nila

kung ganyan nga, kayganda palang maging komunista

ika nga nila, magbigay ayon sa kakayahan

dagdag pa, kumuha ayon sa pangangailangan 

kung community pantry'y ganyan ang paninindigan

mabuti palang maging komunista kapag ganyan

sinabi nga noon ni Obispo Hélder Câmara

"When I give food to the poor, they call me a saint. 

When I ask why they are poor, they call me a communist."

mabuting gawa'y santa, pag nagtanong, komunista

kailangan nating tumindig habang iba'y takot

ipaglaban ang makatwiran laban sa baluktot

labanan ang pangre-redtag ng mga utak-buktot

kailangan nating makibaka, huwag matakot

nagsama-sama nang magtulungan ang mga tao

dahil sa mga hindi magampanan ng gobyeno

itinuturo sa atin ng karanasang ito

ang halaga ng pakikipagdadamayang totoo

bayanihan ang ipinakita ng community

pantry dahil nagtutulungan ang masang kayrami

kung tinawag akong komunista dahil sa pantry

sige, komunista na akong sa kapwa'y nagsilbi

- gregoriovbituinjr.